- Elbasynyń bastamasymen júzege asqan «Ǵasyr jobasy» atanǵan Aral teńiziniń soltústik bóligin saqtaý jobasy aıasynda atqarylǵan aýqymdy sharalar nátıjesinde balyq sharýashylyǵy salasy jańa deńgeıge kóterilip, qarqyndy damyp keledi,-dedi oblys ákimi saltanatty jıynda. - Qasıetti Syr eli óziniń jer asty baılyǵy – munaı, ýran, túrli-tústi metaldar, aq kúrishi, tórt-túlik malymen birge Aral balyǵymen maqtana alatyndaı berekeli, qutty mekenge aınalýda. Kóp jyl umyt bolyp, búginde dástúrge aınalǵan balyqshylar sletiniń negizgi maqsaty – salanyń jańa zamandaǵy alar orny jaıly oı salý, osy kásipti damytýdyń joldary týraly pikir almasý bolady.
Búginde Aral teńizinen jylyna 8 myń tonnaǵa deıin balyq aýlanady. Sońǵy 5 jylda aımaqtaǵy balyq aýlaý kórsetkishi 2 esege artqan. 2013 jyldan beri balyq ónimderin óńdeıtin 4 zaýyt salynsa, onyń 4-eýi ónimderin Eýropa elderine eksporttaýǵa múmkindik beretin eýrokodqa ıe.
Balyq ónimderi Reseı, Grýzııa, Ázirbaıjan, Danııa, Polsha men Qytaı elderine eksporttalyp jatyr. 2012 jylmen salystyrǵanda bul kórsetkish 8 esege artty. 2018 jyldyń I jartyjyldyǵynda balyq ónimderin eksporttaýda 32 paıyzǵa ósim baıqaldy.
Baqtııar TAIJAN,
«Egemen Qazaqstan»
