Osydan bir aı buryn óńir basshysy Berdibek Saparbaevtyń tapsyrmasymen oblys ortalyǵyn sanıtarlyq tazalaý jáne kóriktendirý, áleýmettik nysandar men turǵyn úılerdiń qurylysy jáne kúrdeli jóndeý, sonymen qatar, áleýmettik-ekonomıkalyq damytý máseleleri boıynsha úsh jumys toby qurylǵan edi.
16 shilde, dúısenbi kúni jumys toptarynyń basshylary qyzmetteriniń nátıjeleri týraly esep berdi.
Baıandamalardy tyńdap shyqqan oblys ákimi jumys toptarynyń qyzmetin maquldap, qoıylǵan mindetterdiń júzege asyrylýyn jalǵastyrýdy tapsyrdy.
Jıyn barysynda qaladaǵy eki aýdan ákimdikteriniń, qoqys shyǵaratyn uıymdar men 31 basqarýshy kompanııalardyń jumystary qaraldy. Olardyń basshylaryna qaramaǵyndaǵy aýmaqtarǵa tártip ornatý sharalaryn, al jergilikti polısııa qyzmetine kóriktendirý erejelerin buzýshylarmen kúresti barynsha kúsheıtý tapsyryldy.
- Barlyq baqylaýshy organdar jumysty kúsheıtýleri tıis. Bul sondaı-aq, jergilikti polısııa qyzmetine de qatysty. Basqarýshy kompanııalar ózderiniń rezervterin iske qosyp, ózderiniń tıimdilikterin dáleldeıtin ýaqyt jetti, - dep atap kórsetti óńir basshysy.
Oblys ákiminiń orynbasary, kóriktendirý jónindegi jumys tobynyń basshysy Mavr Abdýllın málimdegendeı, ótken aıda mindetterin oryndaı almaǵan tórt basqarýshy kompanııanyń basshylary qyzmetterinen bosady.
Budan basqa, M. Abdýllın eseptik kezeńniń ishinde Aqtóbede 30 myń sharshy metr jaıaýjol taqtaıshalary tóselgenin, bes sýburqaqtyń jóndelip, qoqys polıgony aýmaǵynyń tolyqtaı qorshalǵanyn habarlady. Aqtóbe qalasyndaǵy ortalyq bazar men oǵan irgeles aýmaqtardaǵy sanıtarlyq normalardyń buzylýyn joıýda aýqymdy jumystar atqaryldy.
О́ńir basshysy turǵyn úı aýlalaryn kóriktendirýdiń mańyzdylyǵyn eske saldy.
- «Baqytty bala» jobasy aıasynda oıyn jáne sport alańdaryn ornatýdy jalǵastyrý qajet, - dep atap ótti Berdibek Saparbaev.
Oblys ákiminiń orynbasary Serik Tólenbergenov basqaratyn jumys tobyna áleýmettik nysandar qurylysynyń, kúrdeli jóndeý jumystarynyń sapasy men merziminiń saqtalýyn qatań baqylaýdy jalǵastyrý tapsyryldy. Bıyl oblysta kem degende 870 myń sharshy metr turǵyn úı men 8000 jańa páterdi paıdalanýǵa berý josparlanyp otyr. Avtomobıl joldary qurylysy men jóndeý, jańa jáne toqtap turǵan ónerkásip nysandaryn paıdalanýǵa berý merzimderin saqtaýǵa qatysty da osyndaı tapsyrma berildi.
Jıyndy túıindegen oblys ákimi Aqtóbe qalasy ákimdiginen, ókiletti memlekettik organdardan, sonymen qatar, kommýnaldyq kásiporyndardan qala turǵyndarynyń qazirgi mańyzdy máselelerin, sonyń ishinde qoǵamdyq kólikke qatysty jumystardy jedel sheshýdi talap etti.
Aıta ketý kerek, jýyrda jańa avtobýstardy belsendi túrde satyp alyp jatqan «PATP» JShS úlgisimen «Avtopark» JShS da ilgeri qadamdar jasamaqshy. Tasymaldaýshy kompanııalardyń ókilderi 55 jańa avtobýs satyp alýǵa daıyndyq ústinde ekenderine sendirdi. Bul Aqtóbedegi qoǵamdyq kólikterdiń qozǵalys kestesine oń áserin tıgizý kerek.
Temir QUSAIYN,
«Egemen Qazaqstan»
