Sharaǵa «Qazaqstan» teleradıokorporasııasynyń basqarma tóraǵasy Erlan Qarın men «Qazsport» telearnasynyń dırektory Pavel Sybýlın qatysty.
«Fýtboldan álem chempıonaty bul barlyq fýtbolsúıer qaýym úshin sport álemindegi mańyzdy da, qýanyshty oqıǵalardyń biri. О́zderińiz biletindeı «Qazaqstan» jáne «Qazsport» telearnalary fýtbol oıyndarynyń barlyq 64 matchyn tolyǵymen tikeleı efırde kórsetti. Reseıdegi FIFA 2018 fýtboldan álem chempıonatynyń kórsetkishi 2014 jylǵy álem chempıonatyna qaraǵanda 16%-ǵa artty», deıdi Erlan Qarın.
«Qazaqstan» telearnasynda eń kóp kórilgen match – Reseı men Egıpet komandalary arasyndaǵy oıyn, úlesi 47,4%. Al kórsetkishi 6,97 paıyzdy qurady. Condaı-aq, «Qasport» telearnasynda kórsetilgen Reseı men Horvatııa komandalarynyń oıyny úzdikter qataryna kirip, 44.3% úlesimen 7.32% reıtıngtik kórsetkishke jetti. Al eń tómengi reıtıng «Shveısarııa – Kosta-Rıka» arasyndaǵy match boldy, úlesi 5,3% qurasa, reıtıngisi 0,58% ǵana boldy.
Sonymen qatar, árbir matchtyń ortasha aýdıtorııasy shamamen jarty mıllıonǵa jýyq kórermendi jınady. Sonyń ishinde kórsetilim jaǵynan eń joǵarǵy kórsetkishke ıe bolǵan Reseı – Horvatııa oıyny boldy, LIVE rejiminde 339 455 adam tamashalady. Al Reseı – Saýd Arabııasy oıynyn bar-joǵy 16 819 adam kórgen bolyp shyqty. Sondaı-aq, kórermenderimiz fýtboldy «Qazaqstan TV» qosymshasynan kórý múmkindigine ıe boldy, qazirgi sátte bul qosymshany 263 511 ret júktegen.
Aıta keteıik, taǵy bir jaqsy jańalyǵymyz – 2022 jyly Qatarda ótetin fýtboldan álem chempıonatyn translıasııalaý quqyǵyna ıe boldyq
Esterińizge sala keteıik, 14 maýsym – 15 shilde aralyǵynda Reseıde FIFA-2018 fýtboldan álem birinshiligi ótken bolatyn. Bul jarysqa álemniń eń tańdaýly 32 ulttyq qurama qatysty. Reseıde ótken fýtboldan álem chempıonatynyń Qazaqstan Respýblıkasynyń aýmaǵyndaǵy resmı habar taratýshylary - «QAZAQSTAN» jáne «QAZSPORT» telearnalary.
«Fýtboldan álem chempıonatyn tikeleı efırdegi kórsetilimin joǵary deńgeıde ótkizdik dep oılaımyn, sebebi jaqsy pikirler aıtylyp jatty.
Sonymen qatar, 7 shildede «Qazsport» telearnasy ortasha táýliktik úlesi jaǵynan 18,3 paıyzdy kórsetip absolıýtti rekord ornatty. Arnanyń reıtıngi 1,6%-dy qurady. Al Reseı – Horvatııa matchynda barlyq 6+ aýdıtorııasymen 1 018 910 kórermen jınap rekord ornatyldy. Kórermenderimiz tamasha oıyndardyń kýási boldy, bizdiń kommentatorlarymyz barynsha atsalysty. Turaqty kommentatorlardan bólek Eseı Jeńisuly, Ermuhamed Máýlen, Sergeı Raılıan jáne basqalary arnaıy shaqyryldy. Sondaı-aq, keıbir matchtardy oqıǵa alańynan tikeleı jetkizý úshin Rýslan Baqytjan men Tımýr Súleımenov syndy bilikti mamandar boldy
Sondyqtan, osy sharany qorytyndylaı kele eń úzdik kommentatordy anyqtaý úshin baıqaý jarııalaýdy uıǵardyq. Baıqaý áleýmettik jelilerde korporasııamyzdyń barlyq akkaýnttarynda jarıalanǵan bolatyn. 14 kommentatordyń arasynan Ermuhammed Máýlen men Eseı Jeńisuly, Sergeı Raılıan jáne Tımýr Súleımenov eń kóp daýys jınap, úzdik kommentator atandy.
Sondaı-aq, «Qazaqstan» teleradıokorporasııasynyń atyna sapaly jumysy úshin FIFA-dan alǵys hat jiberildi. Bul týrnırdi oıdaǵydaı ótkizýimizdiń bir sebebi qyzmetkerlerdiń jumyla jumys isteýiniń arqasynda. Barlyqtaryńyzǵa alǵysymdy bildiremin!» dedi «Qazsport» telearnasynyń dırektory Pavel Sybýlın.
