Atalǵan is-sharaǵa, sondaı-aq Qaraǵandy oblysynyń ákimi Erlan Qoshanov, Parlament depýtattary, Qazaqstan Qarýly Kúshteriniń ardagerleri, «Jas sarbaz» áskerı-patrıottyq qoǵamdyq qozǵalysy respýblıkalyq shtabynyń músheleri, memlekettik organdar, qoǵamdyq birlestikter ókilderi, áskerı-patrıottyq klýbtardyń, respýblıkalyq «Jas Ulan» mektebiniń jáne oblystardaǵy áskerı mektep-ınternattardyń 600-den astam tárbıelenýshisi qatysty.
Memlekettik hatshy óziniń quttyqtaý lebizinde Elbasy, Qazaqstan Qarýly Kúshteriniń Joǵarǵy Bas Qolbasshysy Nursultan Nazarbaevtyń: «Memleket árdaıym óz qaýipsizdigin jáne shekarasynyń beriktigin oılaýǵa tıis» degen sózine nazar aýdardy.
– Sondyqtan árbir qazaqstandyq árdaıym jaýapty ári mártebeli mıssııaǵa – týǵan elin, Qazaqstanymyzdy qorǵaýǵa daıyn bolýy kerek dep sanaımyn. Bul – kez kelgen azamattyń qasterli boryshy ǵana emes, eń aldymen, Otan qorǵaý jolynda máńgilik dańqqa, halyq súıispenshiligine bólengen babalarǵa, ákelerimiz ben atalarymyzǵa degen taǵzym men qurmettiń belgisi, – dedi Gúlshara Ábdiqalyqova.
Al Qorǵanys mınıstriniń orynbasary Talǵat Muhtarov elimizdiń damýy men keleshegi jastarǵa tikeleı baılanysty ekendigin atap ótti.
– Jastarǵa tárbıe berý isinde áskerı-patrıottyq jumystyń máni óte zor. Sondyqtan jastardyń úlken jıynyn ótkizip kelemiz. Bıylǵy jıynnyń ereksheligi – Qarýly Kúshterdiń, sondaı-aq Ulttyq qaýipsizdik komıtetiniń Shekara qyzmetine qarasty áskerı bólimderi men mekemeleri janynan qurylǵan áskerı-patrıottyq jıyndardyń tárbıelenýshileriniń qatysýy bolyp otyr, – dedi T.Muhtarov.
Onyń aıtýynsha, sońǵy jyldary elimizdiń aýmaǵynda kadet synyptary kóptep ashyla bastaǵan. Atap aıtqanda, mınıstrlik jýyrda ǵana Astana ákimdigimen birlesip elordanyń 20 jyldyǵyna baılanysty 30 kadet synybyn ashty. Mundaı topqa qabyldanǵan jastar basqa pándermen birge, áskerı mamandyqtyń qyr-syryn, qoıan-qoltyq urys tásilderin, robot tehnıkasynyń negizderin úırenýde.
– Bizdi jastar arasynda ómirin áskerı salamen baılanystyrǵysy keletin órenderdiń kóptigi qýantady. Olardyń qazirdiń ózinde otan qorǵaýshylarmen bir sapta turýǵa qulshynystary joǵary. Osy ári kúrdeli, ári mártebeli mamandyqty tańdaýǵa áskerı-patrıottyq tárbıe berý ortalyqtarynyń áseri mol, – dedi general-leıtenant.
Sonymen qatar Qorǵanys mınıstrliginiń derekterine qaraǵanda, Astanada Qazaqstannyń Tuńǵysh Prezıdenti, Qazaqstan Qarýly Kúshteriniń Joǵarǵy Bas Qolbasshysy atyndaǵy áskerı-patrıottyq baǵyttaǵy demalys jáne mádenıet saıabaǵyn salý josparlanǵan.
Is-sharaǵa qatysýshylarǵa quttyqtaý sózin arnaǵan Qaraǵandy oblysynyń ákimi Erlan Qoshanov ta «Aıbyn» jıynynyń patrıottar ustahanasyna aınalǵandyǵyn atap ótti. Sonymen qatar oblys ákimi barlyq qatysýshylarǵa osy aıtýly sharanyń tıimdi ári paıdaly bolýyna tilektestigin bildirdi.
«Aıbyn» jıynyna elimizdiń túpkir-túpkirinen jınalǵan jastardyń barlyǵy derlik aımaqtardaǵy áskerı-patrıottyq jıyndardyń jeńimpazdary boldy. Olarǵa is-sharanyń ashylý rásiminde Qazaqstan Respýblıkasy Qarýly Kúshteriniń bólimsheleri tarapynan jas patrıottarǵa áskerı ónerdiń qımyl-áreketteri kórsetildi. Ásirese, yqtımal qarsylastarǵa áýeden jáne jerden jasalatyn soqqylardyń, áskerı qas sheberlerdiń ónerlerin tamashalaǵan jetkinshikter erekshe áserge bólendi. Solardyń qataryndaǵy aqtóbelik Álisher Qartbaı ákesiniń jolyn qýyp áskerı salaǵa tańdaý jasaǵandyǵyn, endi jıyndaǵy kórinisterden keıin Keńes odaǵynyń eki márte batyry Talǵat Bıgeldınov atyndaǵy Áýe qorǵanys kúshteri áskerı ınstıtýtyna oqýǵa túsip, áskerı ushqysh atanýǵa túpkilikti sheshim qabyldaǵanyn jetkizdi.
– Aımaqtarda osy jıynǵa kelýdiń ózi ońaıǵa soqqan joq. Alaıda oblystyq jıynda bıik kermege 25 ret tartylyp, avtomatty qarýdy 13 sekýndta jartylaı bólshektep-qurastyryp jeńimpazdardyń qatarynan kórindim. Al «Aıbyn» jıynyndaǵy kórinister meniń armanyma qanat bitirdi, – deıdi Á.Qartbaı. Al osy Álisherdiń boıyndaǵy sezim ushqyny barlyq qatysýshylardyń janarlarynan baıqalyp turǵandyǵyn da aıta ketý kerek.
Jalpy bes kúnge sozylatyn «Aıbyn» respýblıkalyq áskerı-patrıottyq jastar jıynynyń josparyna sáıkes Qarýly Kúshter quramyna kiretin ásker túrleri ókilderiniń jıynǵa qatysýshylarmen «Uly dala áskeri – «Máńgilik El» tiregi!» atty taqyryptaǵy ınteraktıvti kezdesýi, sonymen qatar «Aıbyn daryny» zııatkerlik oıyny, robot tehnıkasy boıynsha «Meniń robotym» konkýrsy, alaý túbinde «Aıbyn jalyny» atty qyzyqty kesh, sporttyń áskerı-qoldanbaly túrlerinen jáne jaýyngerlik daıyndyq pánderinen kóptegen saıystar uıymdastyryldy.
Tárbıelenýshiler, sondaı-aq áskerı-patrıottyq jastar jıyny aıasynda áskerı daıyndyq mektebinen ótip, áskerı tehnıkanyń jáne Qazaqstan áskerindegi qarý-jaraqtyń zamanaýı úlgilerimen tanysty.
Sonymen qatar jıyn aıasynda «Aıbyn – juldyzdyq mekeni» belgisi men «Tilek bildirý aǵashynyń» saltanatty ashylýy da ótti.
Sońynda Memlekettik hatshy jıynǵa qatysýshylarǵa saıystardyń jaqsy ótýine, árdaıym rýh sergektigi men erik-jigerlerin kórsetýine, eshqashan jeńisten úmit úzbeı, Qazaqstannyń naǵyz patrıottary bolýyna nıettestigin bildirip, tolaǵaı tabys tiledi.
Atap óterligi, elimizdiń aýmaǵynda «Jas sarbaz» atty áskerı-patrıottyq qoǵamdyq qozǵalys qurylyp, árbir oblysta bólimsheleri ashylyp, búginde 73 myńnan asa balanyń basyn biriktirip tabysty jumys isteýde.
Qoǵamdyq qozǵalys arqyly búginge deıin áskerı-patrıottyq tárbıe berý salasynda búkilreseılik «Iýnarmııa» áskerı-patrıottyq qozǵalysymen, Qyzylorda oblysynyń ákimdigimen yntymaqtastyq týraly memorandýmǵa qol qoıylǵan. Dál osyndaı qujatqa tórtinshi jıyn aıasynda Qaraǵandy oblysynyń ákimdigimen arada qol qoıyldy.
Serik ÁBDIBEK,
«Egemen Qazaqstan»
