Zelenov aýdanyna qarasty Darııan aýyly buryn aýdan ortalyǵy bolǵan iri eldi meken. Munda byltyrdan beri 300 oqýshyǵa arnalǵan jańa mekteptiń ǵımaraty jáne mektep janynan 100 balaǵa laıyqtalǵan ınternat úıi qurylysy júrip jatyr. Sońǵy úlgidegi barlyq oqý quraldarymen qamtylǵan mekteptiń eń basty ereksheligi, munda oblysta alǵashqy bolyp IT- synyp ashylady. Al Aqjaıyq aýdanyndaǵy Shabdarjap aýyly Oraldan 300 shaqyrym jerde jatqan shalǵaı eldi meken. Byltyr tamyz aıynda bastalǵan 198 oryndyq mektep ǵımaratynyń qurylysy tolyq aıaqtalyp, jańa oqý jylyna shákirt qabyldaýǵa daıyn tur.
Qazaqstandyqtardyń ortaq qýanyshy kúni shaǵyn aýylda osyndaı zamanaýı mektep ǵımaraty paıdalanýǵa berilýi tegin emes. Elimizdegi tynyshtyqtyń, ekonomıkalyq damýdyń, Elbasy saıasatynyń naqty jemisiniń bir kórinisi – osy, dedi A. Kólginov turǵyndarmen kezdesýde.
Shabdarjap aýyly – Taıpaq okrýgine qaraıtyn, burynǵy «Krasnoıar» keńsharynyń bir bólimshesi. Bir tańǵalarlyǵy, naryq kelgeli talaı aýyl joıylyp, talaı eldi meken tarap ketse de, Shabdarjaptan halyq kóshpepti. Taıpaq aýylynyń ákimi Bolat Shálenovtiń aıtýynsha, sońǵy jyldary munda jyl saıyn 2-3 úı jańadan salynady.
– Aýyl turǵyndarynyń uıymshyldyǵy erekshe. Anaý jyly mektep janynan sport zalyn ózderi salyp alǵan. Bıyl aýyl kásipkeri Talǵat Muhamedııarovtyń bastaýymen aýyl ishinde jazǵy tehnıkalyq sý júıesin júrgizdi. Bul ár aýlada baý-baqsha ósirýge keremet múmkindik. Qazir aýylda 745 adam turady. О́tken oqý jylynda mektepte 154 oqýshy bolǵan edi. Bıyl kúzde jańa mektepke 165 oqýshy kelgeli otyr. Demografııalyq ósim osylaı bola berse, az jylda bul jańa mekteptiń ózi tarlyq etedi-aý, –dep kúledi Bolat Baıǵalıuly.
Jańa mektep ǵımaraty shynymen de syńǵyrlap tur. Barlyq oqý kabınetteri qajetti quraldarmen jabdyqtalǵan. Sońǵy úlgidegi robot-tehnıka kabıneti, tehnologııa pánine qoldanylatyn túrli qurylǵylar men tigin mashınalary tur. О́ńirdegi ózge mektepter sııaqty Shabdarjap mektebinde de jańa oqý jylynda oqýshylar Bilimbook kompıýter-transformerlerin paıdalanatyn bolady. Bilimbook – Nazarbaev zııatkerlik mektepteri júıesinde synaqtan ótken ozyq úlgili, jańa ádistemeli sabaqtar júktelgen kompıýter-transformer. Ol ınternetke qosylmaı-aq paıdalanýǵa jaramdy. Qazaq, orys, aǵylshyn tilinde baǵdarlamalar júktelgen Bilimbook jady 2-3 aı saıyn jańartylyp turady.
– 2004-2005 jyldary Prezıdent janyndaǵy memlekettik basqarý akademııasynda bilim alǵan kezimde ınternetke jalǵanǵan jalǵyz kompıýterlik synyp bolatyn. Dál osyndaı ozyq tehnologııany sol jyldary Eýropadan ǵana kóretinbiz. Endi mine, oblys ortalyǵynan 300 shaqyrym jerdegi shaǵyn aýyl mektebi osyndaı múmkindikke ıe bolyp otyr. Qala men dala mektepteriniń aıyrmashylyǵy azaıdy. Elimizdiń damýyna naqty mysal osy emes pe? – deıdi óńir basshysy.
Osy aýylda otyz jyl muǵalim bolǵan eńbek ardageri Sálıma Sarıeva memlekettiń qoldaýyn alys aýyl turǵyndary da sezine bastaǵanyn aıtty.
Aqjaıyq aýdanynyń ákimi Ádil Jolamanovtyń aıtýynsha, bıyl Taıpaq aýyldyq okrýgine qarasty Shabdarjap, Tompaq aýyldary taza aýyz sýmen qamtamasyz etilmek. Qazirdiń ózinde aýyz sý qubyryn tartý jumystary bastaldy, bul jobaǵa 445,7 mln teńge qarastyrylǵan. Nátıjesinde eki aýyldyń 1 myńnan astam turǵyny taza aýyz sýmen qamtylady. Jalpy, aýdannyń 14 eldi mekeninde aýyz sýmen qamtý jumystary júrgizilýde. Buǵan qosa, aýdan ortalyǵynyń soltústik-batys aımaǵyn elektr jelisimen jabdyqtaý, Chapaev kentinde 3 qabatty 24 páterli turǵyn úı qurylysyn salý bastalǵan. Bıyl aýdanda barlyǵy 4000 sharshy metrden astam turǵyn úı qurylysy boı kóteredi.
– Elbasy jaqynda Oral qalasyna kelgen saparynda óńirdegi shaǵyn jınaqty mektepter jóninde arnaıy surady. О́ıtkeni oblystaǵy mekteptiń 60 paıyzy shaǵyn jınaqty mektepke jatady. Biz osyndaı 223 mektepti Bilimbook kompıýter-transformerimen qamtamasyz etemiz. Kerek jerinde ınternat salyp jatyrmyz. Aldaǵy 2-3 jylda óńirde stýdentterge arnalǵan 7 jataqhana boı kóteredi. О́ńirge qajetti mamandyqtarǵa granttar bólemiz. Bilim máselesi bizdiń erekshe nazarymyzda, – dedi turǵyndar aldynda A. Kólginov.
Qazbek QUTTYMURATULY,
«Egemen Qazaqstan»
Batys Qazaqstan oblysy
