Halyqtyń ómir súrý jasynyń uzarýyna jáne jańa tehnologııalardyń damýyna baılanysty medısınalyq qyzmetterdi tutyný kólemi jyldan-jylǵa artyp keledi. Bul rette Memleket basshysy Nursultan Nazarbaev «Qazaqstannyń úshinshi jańǵyrýy: jahandyq básekege qabilettilik» atty Joldaýynda bıznesti qaıta retteý boıynsha júıeli sharalar legin qabyldaýdy tapsyrǵany belgili. Onyń ishinde jeke qyzmet kórsetý sektoryn, sondaı-aq medısına salasyn da damytý kózdelgen bolatyn.
Byltyr el Úkimeti densaýlyq saqtaý júıesin qaıta retteý boıynsha aýqymdy jumys atqardy. Bızneske kedergilerdi qysqartý nátıjesinde jeke usynýshylardan medısınalyq qyzmetterdi satyp alý úlesi 2017 jylǵy 8%-ten 2018 jyly 13 %-ke deıin artty. О́tken jyly densaýlyq saqtaý salasyna salynǵan ınvestısııa kólemi 50%-ke kóbeıip, 91,4 mlrd teńgeni qurady. Jeke ınvestısııa úlesi 2016 jylǵy deńgeıge shaqqanda 90%-ke (23,3 mlrd teńgeden 44,2 mlrd teńgege deıin) deıin artty.
Almatyda iske qosylǵan ońtústikkoreıalyq ambýlatorlyq klınıka Ortalyq Azııa aýmaǵyndaǵy sheteldik ınvestısııa esebinen salynǵan alǵashqy medısınalyq mekeme. Emhanada tıimdi ota jasaý júıeleri men Koreıadan jetkizilgen ozyq dıagnostıkalyq tehnologııalar bar. Sonymen qatar Sıngapýr tehnologııalary da paıdalanylady.
Obyr skrınıngin júzege asyrý úshin Seýl ulttyq ýnıversıteti janyndaǵy BIOiNFRA ǵylymı bıologııalyq kompanııasy obyrdy anyqtaý úderisine tolyq tehnıkalyq qoldaýdy qamtamasyz etpek. Al sıngapýrlyq kompanııa (POCT MDx) One Biomed molekýlalyq dıagnostıkasyna negizdelgen genetıkalyq jáne juqpaly aýrýlarǵa zertteýler júrgizý úshin tehnıkalyq seriktes bolady. Sonymen qatar klınıka Koreıadaǵy jetekshi zerthanalardyń biri Seegene Medical Foundation ınvestısııalaryn tartyp, Qazaqstanda ortalyqtandyrylǵan zerthanalyq jelini qurý isimen aınalysady. MPKQAZ Qazaqstanda operasııalyq menedjmentti koreıalyq medısına mamandary júrgizetin medısınalyq kompanııalar tobyn qurýǵa nıetti. Emhana pasıentterge júıeli jáne qolaıly qyzmet kórsetýdi qamtamasyz etip qana qoımaı, koreıalyq dárigerlerdiń kómegimen jan-jaqty júıeli sapalyq baqylaý júrgizedi.
MPKQAZ bas dırektory, professor Ǵalymjan Toǵyzbaev bul klınıka Qazaqstan men Koreıanyń yntymaqtastyǵynyń, atap aıtqanda, «blood mix» jarqyn mysaly bolyp otyrǵanyn jetkizdi. 5 jyldan soń Medical Partners Korea Qazaqstan emhanasy Qazaqstandaǵy alǵashqy sheteldik medısınalyq klınıka retinde Koreıa qor naryǵy qatysýshylarynyń qaýymdastyǵyna (KOSDAQ) kirýdi josparlap otyr.
«MPKQAZ Koreıanyń ozyq medısınalyq tehnologııalaryn jáne qyzmet kórsetý salasyndaǵy baı tájirıbesin qoldaný arqyly pasıentterge qyzmet kórsetý júıesi men kóp ulttyq medısınalyq operasııa júıesin qurýǵa ázir», deıdi medısınalyq dırektor, kardıolog-dáriger Hısýk Mın.
«Egemen-aqparat»
