«Astana-trıatlon - 2018» sharasyna 18 jastan asqandardyń barlyǵy qatysa alady, dep habarlaıdy elorda ákimdiginiń resmı saıty. «Astana-trıatlon - 2018» sharasyna qatysýshylar Astana qalasynyń trıatlon federasııasynyń http://triathlonastana.kz saıtyna kirip onlaın arqyly aldyn ala tirkelýge mindetti. Starttyq paket jarnasy - 5000 teńge.
Starttyq paketter saǵat tańǵy 6:30-da berile bastaıdy. Negizgi jarystar saǵat 8:00-ge belgilenip otyr. О́tetin orny: Astananyń trıatlon saıabaǵy. Trıatlonnan ashyq týrnırge qatysamyn deýshiler ózderimen birge mindetti túrde velosıped pen shlemin ala kelýi tıis.
«Qatysýshylar «Astana Trıatlon Saıabaǵy» aýmaǵyndaǵy Esil ózeniniń boıymen (750 metr) júzip ótedi. Sonymen qatar, «Astana Trıatlon Saıabaǵy» aýmaǵynan «Astana Music Hall» turaǵy arqyly B. Momyshuly k-si, Saraıshyq k-si, Shalqyma k-si, Sharl de Goll kóshesindegi «Krysha» meıramhanasynyń turaǵyna kirý arqyly «Astana Trıatlon Saıabaǵy» aýmaǵyna deıingi 20 shaqyrymdy velosıpedpen baǵyndyrady. Dıstansııanyń sońynda olar «Astana Trıatlon Saıabaǵy» aýmaǵyn 2 aınalymnan turatyn 5 shaqyrymdyq júgirý baǵytyn aıaqtap márege jetedi.
Alańda ornatylǵan medısınalyq pýnktte árbir qatysýshy jarysqa qatysýǵa dárigerlerdiń ruqsatyn alady. Velosıpedke arnalǵan dýlyǵasy joq qatysýshylar jarysqa jiberilmeıdi», - delingen Astana qalasy ákimdiginiń mádenıet jáne sport basqarmasynyń habarlamasynda.
Aıta keteıik, jarysqa jiberilgen qatysýshylar jas ereksheligi boıynsha bes topqa bólinedi 18 – 29 jas (erler, áıelder); 30 – 39 jas (erler, áıelder); 40 – 49 jas (erler, áıelder); 50 – 59 jas (erler, áıelder); 60 jas jáne úlken.
Árbir top boıynsha jeńimpazdar qashyqtyqty eń az ýaqytta baǵyndyrýyna qaraı anyqtalady. Hronometraj arnaıy qondyrǵynyń arqasynda jeke-jeke belgilenetin bolady. Qashyqtyqty eń az ýaqyt ishinde júrip ótken qatysýshy ár toptyń jeńimpazy bolady.
Ár jas sanatynyń 1, 2, 3 oryn ıegerleri sertıfıkattarmen jáne baǵaly syılyqtarmen marapattalady. «Astana-Trıatlon 2018» jarysyna qatysqan barlyq sportshylarǵa medaldar tabystalmaq.
