Skytrax álemdegi áýe kompanııalary men áýejaılary kórsetetin qyzmetterdiń sapasyn zerdeleıdi. Skytrax zertteýi – jolaýshylardyń pikirlerine negizdelgen jáne álem boıynsha moıyndalǵan qyzmet kórsetý sapasyn baǵalaý. Bıyl oǵan jer-jahandaǵy 19 mıllıonnan astam adam qatysqan. Áýe kompanııalarynyń qyzmet kórsetý sapasy mynadaı talaptar boıynsha baǵalanǵan: jolaýshylardy tirkeý, olardy bortqa otyrǵyzý, salon tazalyǵy men yńǵaılylyǵy, taǵamdar men sýsyndar sapasy, borttaǵy oıyn-saýyq júıesi, borttyq qyzmet kórsetý deńgeıi. Zertteý 200 iri halyqaralyq jáne shaǵyn jergilikti áýe tasymaldaýshylaryn qamtyǵan.
«Biz úshin osy marapatty alý úlken qurmet. Bizdiń jumysymyzǵa mundaı baǵa berý óte mańyzdy, bul jolaýshylarymyzdyń derbes tańdaýyna negizdeledi. Osyndaı marapatqa laıyq dep tanyǵany úshin shyn júrekten alǵysymyzdy bildiremiz. Sondaı-aq, áýekompanııa qyzmetkerlerine alǵys aıtqym keledi. Olar árdaıym joǵary sapaly qyzmet kórsetý úshin kúndelikti jumystarynda baryn salady. Qyzmet kórsetýdiń odan da joǵarǵy standarttaryna jetý úshin jetildirý jumystaryn jalǵastyramyz», dedi «Eır Astana» áýekompanııasynyń prezıdenti Pıter Foster.
Esterińizge salaıyq, bıyl «Eır Astana» áýekompanııasy IPO-ǵa shyǵý josparlanyp otyr, bul eldegi aksıonerlik kapıtaldyń ishki naryǵyn damytýǵa jol ashady.
