«Biz Fransııadaǵy áriptesterimizge saýal joldadyq. Jaýap keldi, biraq salyq tóleýshi ózi týraly aqparatty jarııalaýǵa ruqsat bermedi. Sondyqtan, ol týraly tolyq aqparat bere almaımyz. Ol óz tabysyn kórsetti, salyqtary tólengen jáne óz aqshasyna jyljymaıtyn múlik satyp alǵan. Páter ıesi - Úkimet qyzmetkeri emes», - dep jaýap berdi Mádı Takıev Úkimet úıinde ótken baspasóz máslıhatynda jýrnalıster suraǵyna.
Sondaı-aq, komıtet ókili 65 mln eýro turatyn páterdiń kompanııa atyna tirkelgenin atap ótti.
«Biz kompanııanyń kiris kózderin tekserdik. Páter adamnyń emes, kompanııanyń atyna tirkelgen. Sáıkesinshe, kompanııa kiristeri mundaı páterdi satyp alýǵa múmkindik bere alady jáne barlyq salyqtary tólengen», - dedi Mádı Takıev.
Eske sala ketsek, buǵan deıin Qarjy mınıstrligi 65 mln eýroǵa Parıjde aýmaǵy 1200 sharshy metr páterdi satyp alǵan qazaqstandyqqa izdeý salǵan bolatyn. Onyń aıtýynsha, qymbat páter ıesi memlekettik qyzmetpen aınalyspaıdy.
