Kongreske álemniń 20-dan astam elinen jetekshi sáýletshiler, ýrbanıster men zertteýshiler qatysty.
Kongrestiń ashylýynda QR mádenıet jáne sport vıse-mınıstri Aqtoty Raıymqulova sóz sóıledi.
«Biz búkil álem sáýletshileriniń shyǵarmashylyǵyna zor qurmet bildire otyryp, árdaıym jańa jobalardy qýana kútemiz, elimiz eń ádemi elderdiń biri bolýy úshin jumys isteýge árdaıym ázirmiz. Kongress álem sáýletshileri jınalyp, ózekti problemalardy talqylaı alatyn alańǵa aınalady dep úmittenemiz», — dedi A. Raıymqulova.
Astana qalasy ákiminiń orynbasary Malıka Bekturova óz sózinde qaladaǵy «aqyldy» júıe turǵyndar úshin qalaı qolaıly bolýy kerektigi týraly aıtyp berdi.
«Biz alǵash ret sáýletshiler kongresi men «aqyldy» qala boıynsha bóligin Astananyń damýdyń kelesi kezeńine ótkenin kórsetý úshin biriktirdik. Bul jaı ǵana qurylystar emes, úı «aqyldy» bolýy úshin endi biz energııalyq tıimdi ǵımarattar salyp, materıaldardy, ozyq tehnologııalardy paıdalanǵymyz keledi. Qala ósip kele jatyr, onyń tıimdiligi de arta túsýi tıis. TKSh qarastyrsaq, kóptegen máseleler bar. Árıne, birinshi másele úıdiń tozýyna qatysty. Bári jóndelip bitpeı, smart sheshimder tıimsiz bolyp qala bermek», — dedi ákimniń orynbasary.
Sonymen qatar, búgin Kongress aıasynda osy jyldyń 14–16 shildesi aralyǵynda jas sáýletshiler men stýdentter arasynda startap ýıkend formatynda ótken «Qalalyq orta: «aqyldy» aýdan» baıqaýynyń nátıjeleri jarııalandy.
Úsh kún boıy, tańerteńnen keshke deıin baıqaý qatysýshylary úsh baǵyt – qalalyq orta úshin ınnovasııalar, ýrbanıstıka jáne jergilikti qoǵamdyq keńistikti damytý, «jasyl» tehnologııalar engizý boıynsha sheshimder oılap shyǵardy. «Aqyldy» aýdannyń ornalasqan jeri retinde Astana qalasyndaǵy Jastar shaǵyn aýdany tańdaldy.
Turǵyndar úshin qysqy jylyjaı keshenderin jasaýdy usynǵan «Sredalab» komandasy gran-prı ıelendi. Bul jobanyń ereksheligi, jylyjaılardyń ǵımarattardyń shatyrlary men qasbetterinde shyny úıshikter túrinde salynyp, jylý trassalary, kún batareıalaryn qosý, jel energııasy arqyly jylytyla alatyndyǵynda. Jylyjaıdyń iske qosylýynan túsetin kiristi ıdeıa avtorlarynyń oıynsha, aýdan turǵyndary aýla terrıtorııasyn abattandyrýǵa nemese balalarǵa qajetti quraldary satyp alýǵa baǵyttaı alady.
Birinshi oryndy «Nurcelona» komandasy ıelendi. Olar qaladaǵy kólik turaqtary úshin AirBnB balamasyn jasaýdy usynǵan.
Qalalyq drenaj júıelerin usynǵan «RainTech» komandasy ekinshi orynǵa ıe boldy.
Úshinshi oryndy «AT mektebi» komandasy aldy. Olardyń sheshimi — múmkindigi shekteýli jandar úshin AT-mektep qurý.
Astana ákiminiń arnaıy syılyǵymen «King Wins» komandasy marapattaldy.
Astana Innovations basqarma tóraǵasy Oljas Sartaev jeńimpazdardyń óz ıdeıalaryn «aqyldy» aýdan jobasy aıasynda iske asyrýǵa múmkindikteri bolatynyn aıtty.
«Ol «Jastar» shaǵyn aýdanynda. Búginde onda osy úsh baǵyt boıynsha birneshe tehnologııa engizilgen. Jumystar jalǵasýda. Jylyjaı keshenderi týraly aıtsaq. Olardy iske asyrý úshin úsh-tórt aı ýaqyt kerek. Biz óz tarapymyzdan baǵalap, bıyl eń bolmasa bir jylyjaıdy shaǵyn aýdanǵa shyǵarýǵa tyrysamyz. Kólik turaqtary boıynsha jobalarǵa qatysty. Ony Jastar shaǵyn aýdanynda basymdyqpen iske asyramyz. Biraq biz bul aýdanmen ǵana shektelip qalmaımyz», — dedi O. Sartaev.
2018 jyly sáýir aıynda Baıqońyr aýdanynyń A. Baraev, A. Kravsov, J. Táshenov jáne T. Hýseın kósheleriniń qıylysyndaǵy «Jastar» shaǵyn aýdanynda ornalasatyn «aqyldy» aýdan jobasy tanystyryldy. Joba 60 mln teńge jeke ınvestısııalar tartty. Investısııalar «aqyldy» esepteýishterdi ornatýǵa, jaıaý júrginshi joldaryna, aıaldamalardy, sonymen qatar fın kompanııasynyń jylýdy avtomatty retteýishin qoıýǵa jumsaldy.
Halyqaralyq sáýletshiler kongresiniń birinshi kúni «Astana Innovations» AQ men Densaýlyq saqtaý mınıstrligi, Bilim jáne ǵylym mınıstrligi, Eńbek jáne halyqty áleýmettik qorǵaý mınıstrligi, sonymen qatar «Ulttyq tehnologııalyq damý agenttigi» AQ arasynda yntymaqtastyq týraly 4 memorandýmǵa qol qoıyldy.
Eńbek jáne halyqty áleýmettik qorǵaý mınıstrligimen olardyń sıfrlyq keńistikke engizýge bolatyn servısteri bar. Bul servıster tizimi aıqyndaldy. Sonymen qatar, biz mobıldi qosymshaǵa shyǵara alatyn qyzmetter tizimi naqtylandy. Qazirgi tańda dárigerdi úıge shaqyrý men dárigerdiń qabyldaýyna jazylý mobıldi qosymshada bar.
Kongress aıasynda «Qalalyq orta: dástúri jáne bolashaǵy» taqyrybynda halyqaralyq ǵylymı-praktıkalyq konferensııa ótkizildi. Shara plenarlyq otyrys jáne 2 paneldik sessııa formatynda ótti:
Jańa qalalar. Jańadan bastaý;
Áleýmettik jobalaý. Aýladan qalaǵa deıin.
Sonymen qatar Kongress ótken kúnderi «Qundylyqtardy saralaý. Jahandyq mánmátindegi jergilikti sáıkestik» taqyrybyna «dóńgelek ústel» otyrysy ótti. Kongress jumysy barysynda sondaı-aq sheberlik synyptary uıymdastyryldy, tabysty sheteldik sáýletshilerdiń dáristeri oqyldy, «Ortany kim qurady?» taqyrybynda dıalog boldy.
