Osy oraıda kópten el aýzynda, qaǵaz júzinde, aqparat aıdynynda júrgen Kendirli shyǵanaǵy aldymen aýyzǵa iligedi. Jańaózen qalasynan 70 shaqyrym qashyqtyqtaǵy shalǵaı shette qolǵa alynǵan, Kaspıı teńiziniń qazaqstandyq bóliginde álemdik deńgeıdegi alǵashqy kýrorttyń qurylysyn salý el Úkimetiniń 2014 jylǵy 19 mamyrdaǵy № 508 qaýlysymen bekitilgen jáne Qazaqstannyń týrıstik salasyn 2020 jylǵa deıingi damytý tujyrymdamasynda belgilengen basym jobalardyń biri bolyp tabylatyn jobanyń júzege asyrylýynda asyǵystyq joq.
Jyl saıyn «О́zenmunaıgaz» AQ-qa qarasty demalys bazasy deńgeıinde qyzmet etip, munaıshylardy jáne az-maz qonaqtardy qabyldap kele jatqan shyǵanaqqa qatysty jobanyń mejelengen shyńyna sharyqtaı shyǵyp, teńiz jaǵasyndaǵy aıtýly kýrortty aımaq retinde jarqyraı kóz tartyp, alys-jaqyn elderdiń týrısterin shaqyrýyna qashan qol jetkizemiz?
Jobany júzege asyrý aıasynda, ıaǵnı Kendirli kýrortyn damytý júıelik josparyna sáıkes, syıymdylyǵy 60 myń tósek-oryn, onyń ishinde 40 myń oryn týrısterge jáne 20 myń oryn qyzmetkerler men olardyń otbasylaryna arnalǵan 22 qonaq úı, 16 400 rezıdensııa salý kózdelgen. Sondaı-aq kelýshilerge qyzmet kórsetý úshin bólshek saýda ortalyqtary, ashyq aspan astyndaǵy jáne jabyq jerlerdegi sporttyq jarystar úshin ǵımarattar, úsh golf alańy, ıahtalyq aılaq jáne jergilikti halyq úshin qoǵamdyq maqsattaǵy ártúrli ǵımarattar, ózge de kóptegen ǵımarattardyń qurylysyn salý qarastyrylǵan. Jalpy quny shamamen 3,3 mlrd AQSh dollaryn quraıtyn jobada 2020 jylǵa deıingi eseptelgen ınvestısııa kólemi 1,96 mlrd AQSh dollaryn quraıdy.
Qazirgi tańda Kendirli kýrortty aımaǵyn júzege asyrý úshin tolyq ınfraqurylymǵa qol jetkizý, áýejaı qurylysyn salý jáne aımaqqa gaz jetkizý máseleleri kún tártibinde tur. Aldymen aýqymdy jobany qolǵa alatyn senimdi ınvestor tabý ózekti. Bul táýekelge, ıaǵnı kýrortty damytýǵa germanııalyq ChironGmbH kompanııasy (negizgi ınvestorlar – Analoga jáne CESAInvest) qyzyǵýshylyq bildirgen. «Kendirli» kýrortty aımaǵy qurylysyn salýǵa qatysty Qazaqstan Úkimeti men Germanııa arasyndaǵy kelisimniń jobasy Mańǵystaý oblysy ákimdiginiń tıisti memlekettik organdarymen qarastyrylyp, usynystar men eskertýler Investısııalar jáne damý mınıstrligine joldanǵan.
Nemis kompanııasy Kendirli shyǵanaǵynda 2700 gektarǵa jaqyn alqapta jaıly qonaqúı keshenderin, ıahtaǵa arnalǵan aılaqtar, bólshek saýda dúkenderi, turǵyn úıler men keńseler jáne basqa da kýrorttyq qalanyń ómiri úshin qajetti ınfraqurylym engiziletin týrıstik kýrorttyq qala ashýǵa nıet bildirýde. Jobanyń birinshi kezeńin iske asyrýda úsh qonaqúı, onyń ishinde bireýi bes juldyzdan kem emes dárejedegi qonaqúı-kazıno, qajetti ınjenerlik-kólik ınfraqurylymy, odan keıingi jyldary ári qaraı keńeıtýmen turǵyn úıler keshenin, turmys qyzmetin kórsetý nysandaryn salý kirgen.
Investorlardy tartý úshin qolaıly jaǵdaılar jasaý maqsatynda «Kendirli» kýrortynyń syrtqy ınjenerlik ınfraqurylymy nysandaryn respýblıkalyq bıýdjet esebinen salý josparlanǵan. Onyń ishinde «Okarem-Beıneý» gaz qubyry tartyldy, «О́zenmunaıgaz» AQ Kendirlide sý tushytý zaýyty qurylysyn salýdy júzege asyrý boıynsha jumystar júrgizýde.
Kendirli áýejaıy qurylysynyń tehnıkalyq-ekonomıkalyq negizdemesin túzetý boıynsha jumys júrgizilip, memlekettik saraptama men ekonomıkalyq saraptamanyń qorytyndysy alyndy. Oblys ákimdigi «Mańǵystaý oblysynyń Kendirli kýrorttyq aımaǵynyń aýmaǵynda ushý-qoný alańymen Kendirli áýejaıynyń qurylysyn salý» jobasyn konsessııalyq joba retinde júzege asyrý týraly sheshim qabyldady.
Demek, kýrortty damytý baǵytyndaǵy jumystar ázirge tek joba kúıinde, usynystar, sheshimder retinde qujattarda ǵana «ómir súrýde». Kendirlidegi kóp istiń kesheýildeýine ne kedergi – qarajat pa, aıdalaǵa aparylar ınfraqurylym qıyndyǵy ma, álde bardy bilip, joqty túsinip, tıimdi kelisimge keletin ınvestor tabý ma? Áli qansha ýaqytqa deıin kókeıdegi ádemi kýrort pen qaǵazdaǵy jyltyraq esepterge telmiretinimiz belgisiz...
Gúlaıym ShYNTEMIRQYZY,
«Egemen Qazaqstan»
Mańǵystaý oblysy
