Ushý-qoný alańy iske qosyldy

Kókshetaý qalasynda  el Táýel­siz­diginiń 20 jyldyǵy qarsańynda taǵy bir ınfraqurylymdyq mańyzdy joba – áýejaıdyń  ushý-qoný alańyn iske qosý rásimi boldy. Alǵashqy  reısti «Skat» áýe kompanııasynyń ushaǵy oryndady. Sol bortpen kelgen  Kólik jáne kommýnıkasııa mınıstri Berik Kamalıevti Aqmola oblysynyń ákimi Sergeı Dıachenko, áýejaı jáne ushý-qoný jolaǵyn qaıta salý jumystaryn atqarǵan merdigerlik kompanııalar basshylary qarsy aldy. Kóksheniń kúmbir kúıi men áýezdi áni qalyqtaǵan áýejaı ba­syndaǵy saltanatta jańa ny­san­nyń tanystyrylýy ótkizilse, jýr­nalıster bortynda «Táýel­siz» degen jazýy bar ushaqtyń jolaýshylarymen áńgimelesýge múmkindik aldy. «Shymkent-Al­maty-Kókshetaý» baǵytymen ush­qan «tuńǵyshtar» ushaqta barlyq qolaılylyqtar qarastyryl­ǵa­nyn, Almatymen eki aralyqqa ne­bári 1 saǵat 45 mınýt jum­sal­ǵanyn rızashylyqpen aıtyp jatty. Saltanat sharasynda sóz bas­taǵan mınıstr B.Kamalıev Elbasy N.Nazarbaevtyń tikeleı baqy­laýyn­daǵy jobany iske asyrý jos­pardan oza júzege asyrylyp jatqanyn, ony qarjylandyrýǵa respýblıkalyq bıýdjetten 8,3 mlrd. teńge bólingenin habarlady. Bul qarajat esebinen áýejaıdaǵy 30 nysan túbegeıli jańǵyrty­la­tyn bolady. Alǵashqy synaqtan oıdaǵydaı ótken Kókshetaý áýe­jaıy zamanaýı áýe kemeleriniń bar­lyq túrlerin qabyldaı ala­tynyn dáleldedi. Bul oǵan Ha­lyqaralyq azamattyq avıasııa uıy­mynyń (IKAO) birinshi kate­go­rııasyn berýge laıyqty degen sóz. Al, kelesi jyly aerovokzal ǵı­maratyn qaıta salý aıaqtalǵan soń mınıstrlik Úkimetke Kókshetaý qalasynyń áýejaıyna halyq­ara­lyq dáreje berý jóninde usynys engizedi. Sonymen, Kókshetaý qa­lasynyń áýejaıy elimizdiń on altynshy halyqaralyq áýejaıy bolady. Qazaqstan 1992 jyldan beri IKAO-nyń múshesi jáne osy halyqaralyq uıymnyń stan­dart­tary men usynystaryn ustaný boıynsha barlyq sharalardy iske asyrýda. Atap aıtqanda, sońǵy 5 jyl­da respýblıkada 7 áýejaıdyń ushý-qoný jolaqtaryn jáne 5 jol­aý­shy termınalyn qaıta salý júr­gi­zildi. Sonymen qatar, 2014 jylǵa deıin respýblıkada taǵy 11 áýe­jaıda ushý-qoný jolaq­ta­ryn, jo­laýshy jáne júk ter­mınaldaryn qaıta salý josparlanýda. Aqmola oblysynyń ákimi Sergeı Dıachenko bul jobanyń Býrabaı kýrortty aımaǵyn damytýda mańyzdy oryn ala­tyn­dyǵyn atap kórsetse, bas merdiger «Qulager» JShS dırektorlar keńesiniń tóraǵasy Tóken Eginbaev qurylysshylar óz mindettemelerin abyroımen oryndaıtyn­dy­ǵyna sendirdi. Baqbergen AMALBEK, Kókshetaý.