Almaty prokýrory Berik Júıriktaev Denıs Tendi óltirdi degen kúdiktiniń esimin atady.
Vedomstvo málimetinshe, ol qylmysyn moıyndady. Ustalǵan kúdiktiniń aty-jóni - Qııasov Nuraly Dáýletbekuly. Kúdikti 1994 jyly dúnıege kelgen, Jambyl oblysynyń týmasy.
«1994 jyly Jambyl oblysynda týǵan Qııasov Nuraly ustaldy. Ol óziniń jasaǵan qylmysyn moıyndady, osy iske advokat qatysyp otyrdy. Ol ýaqytsha ustaý ızolıatoryna qamaldy. Ekinshi kúdiktiniń de kim ekeni anyqtaldy. Qazir ony izdestirý jumystary júrip jatyr», dedi prokýror Berik Júıriktaev BAQ ókilderimen bolǵan brıfıngte.
Qazirgi ýaqytta sotqa deıingi tergeý QR QK 99 baby 2 bóligi boıynsha júrip jatyr.
Aıta keteıik, tanymal qazaqstandyq mánerlep syrǵanaýshy Denıs Ten pyshaq jaraqatymen aýrýhanaǵa 19 shilde kúni tús kezinde jetkizildi. Almaty qalalyq IID-niń málimetteri boıynsha, belgisiz bireýler sportshynyń kóliginiń aınasyn urlamaq bolǵan. Oqıǵanyń ústinen túsken sportshyny urylar jambasynan jaraqattaǵan. Sportshy 3 lıtr qan joǵaltqan. Osy oqıǵadan eki saǵattan keıin Almatydaǵy Ortalyq qalalyq klınıkalyq aýrýhanada Denıs Tenniń qaıtys bolǵandyǵy týraly sýyt aqparat habarlandy.
