Mınıstrliktiń habarlaýynsha, bıylǵy jylǵy maýsym aıynda Túrkistan oblysynyń Túlkibas pen Saıram aýdandarynyń 72 eldi mekeninde, sondaı-aq Arys qalasynda «Shalqar» radıosynyń taratylymyn keńeıtý jumystary tolyq aıaqtalǵan. Osynyń nátıjesinde 185 myń adam ulttyq radıo ıgiligin kóredi.
Shekaralyq aımaqtarda otandyq radıo habar taratý jumystary aldaǵy ýaqytta odan ári jalǵasady. Demek búgingi qadam aqparattyq qaýipsizdik salasyndaǵy irgeli sharalardyń bastaýy bolyp otyr.
Jalpy, bul buǵan deıin el turǵyndary men depýtattar tarapynan jıi kóterilgen túıtkildiń biri. Elimizdiń shekaralyq aımaqtaryndaǵy otandyq radıo habarlaryn taratý máselesin retteýdi suraǵan ótinishter mınıstrlikke de kóptep kelgenin aıtady, mınıstrliktiń baspasóz qyzmeti. Alaıda talaı jyldan beri qordalanǵan problemany sheshýge biraz ýaqyt kerek edi. Alǵashqyda mınıstrlik búkil Qazaqstan boıynsha memlekettik radıostansalardyń qamtý aıasyna taldaý jasaǵan. Osy zertteýlerge qaraǵanda elimizdiń biraz aýmaǵynda, onyń ishinde shekaraǵa jaqyn aımaqtarda, ásirese ońtústik óńirlerde otandyq radıosıgnaldardyń óte nashar ekendigi anyqtalypty. Esesine, jergilikti jurtshylyqtyń radıo qabyldaǵyshtarynda kórshiles Qyrǵyz, О́zbek, Reseı, tipti Qytaıdyń radıolary sańqyldap turǵan. Bul bir mezettik másele bolmaǵandyqtan, mınıstrlik tarapynan áýeli otandyq radıohabardy damytý týraly arnaıy keshendi jospar ázirlendi. Osynyń aıasynda «Qazaq radıosy», «Shalqar» sııaqty radıostansııa efırlerin búkil Qazaqstan aýmaǵyna taratýǵa basymdyq berildi.
Osydan bir jyl buryn «Egemen Qazaqstanǵa» suhbat bergen Aqparat jáne kommýnıkasııalar mınıstri Dáýren Abaev: «Tozǵan sıgnal taratqyshtardy aýystyrý arqyly memlekettik radıohabar jelisin jańǵyrtýdy qolǵa alyp otyrmyz. Sonda radıohabarlarymyz qala men aýyl turǵyndarynda birdeı deńgeıge jetedi. Sonymen birge radıolardyń mazmunyn jaqsartý jumystary da júrgizilip jatyr», degen bolatyn. Mine, jaqsy jańalyqtyń jańǵyryǵy estilgen boıda ıgiligi de kóp kúttirgen joq.
Aqparat jáne kommýnıkasııalar mınıstrligi Medıa taldaý basqarmasynyń basshysy Mádı Ýaısovtyń aıtýynsha, bos radıojıilikterdi paıdalanýǵa qatysty ashyq konkýrs ótkizilip, radıohabarlar taratý aýmaǵy keńeıe túsken. Al shekaraǵa jaqyn eldi mekenderge radıo jıiligin tartý úshin halyqaralyq uıymdardyń kelisimi qajet jáne bul jumystar edáýir kúsh pen ýaqytty talap etedi. О́ıtkeni Qazaqstannyń shekaraǵa jaqyn stansalary kórshi memleketterdiń aýmaǵyna asyp ótetindikten, álemdik tájirıbe boıynsha halyqaralyq ruqsattama júıesi arqyly júzege asyrylady. Osyǵan qaramastan, mınıstrlik tarapynan birinshi kezekte osy shekaraǵa jaqyn eldi mekenderdi otandyq aqparat quraldarynyń habarlarymen qamtýǵa basymdyq berilgen.
Jalpy, otandyq televızııa men radıo salasynyń básekege qabilettiligin arttyrý, qamtý aýmaǵyn keńeıtý boıynsha joǵaryda atalǵannan bólek keshendi sharalar qolǵa alynyp jatqanyn aıta ketken lázim. Sonyń biri – telearnalardyń analogtyq habar taratýdan sıfrlyq habar taratý júıesine kóshirilýi. Mınıstrliktiń málimetterine qaraǵanda, bıylǵy jyldyń qazan aıynda Mańǵystaý oblysy, al jeltoqsan aıynda Túrkistan men Jambyl oblystaryna habar taratý tolyqtaı sıfrly júıege aýysady. О́zge óńirler ári qaraı kezeń-kezeńimen kóshiriledi. Bul rette mınıstrlik jergilikti ákimdiktermen birlese otyryp turǵyndardy sıfrly júıeni paıdalanatyn qurylǵylarmen qamtý josparyn da bekitken.
Al radıohabarlaryn taratý aımaǵyn keńeıtýge qaıta toqtalar bolsaq, bul Arys pen Mankentke radıo qabyldaǵyshty aparyp, toqqa qosa salý emes. Alǵashqy taldaýdan bastap, ortalyq pen jergilikti jerlerdegi rásimdik sharalar, kelisimder men zań talaptaryna baılanysty qujattardyń ózin ázirleýge orasan kúsh jumsalady. Buǵan qosa Qazaqstannyń baıtaq dalasynda radıostansalardy kóbirek jáne jıirek salý da qajet, ol qomaqty resýrsty qajet etedi.
Jarty ǵasyrdan astam ýaqyt boıy ulttyń únjarııasy bolyp kele jatqan «Shalqardyń» kókjıegi keńeıe túsken eldiń qýanyshy.
– Bul tyńdarmandarymyzdyń uzaq kútken qýanyshy. Búgingi is-sharany úlken sharýanyń basy dep oılaımyn. «Shalqardy» ulttyń úni, únjarııasy dep aspandatyp, asqaqtatyp aıtyp júr edik, endi mine sóz ben is qabysyp jatyr, – deıdi «Shalqar» radıosynyń dırektory Qalqaman Sarın.
Serik ÁBDIBEK,
«Egemen Qazaqstan»
