«Jańa ortalyqta jastar jumysqa ornalasý, óz kásibin ashý sııaqty máselelerde paıdaly keńes, naqty kómek alady. Arnaıy ortalyq mamandary jastar kóp jınalatyn jerlerge ózderi shyǵyp ta qyzmet kórsetpek. Qazir munda 4 maman bar, bolashaqta suranysqa qaraı onyń sany kóbeıýi múmkin», - deıdi jastarmen jumys jónindegi resýrstyq ortalyq basshysy Merjan Ábilqas.
Oral qalasynda qyzmetin bastaǵan osyndaı ortalyq endi árbir aýdanda da ashylady. Batys Qazaqstan oblysy ákiminiń orynbasary Ǵabıdolla Ospanqulov óńirdegi barlyq aýdan ákimderine osyndaı tapsyrma berdi.
Aıta keteıik, búginde Batys Qazaqstan oblysy turǵyndarynyń 21,0%-y jastar. Iаǵnı 14 pen 29 jas aralyǵyndaǵy jastardyń sany 136 myńnan asady. Olardyń jartysyna jýyǵy aýylda tirkelgen.
«2018 jyldyń 1 toqsanynda jastar arasyndaǵy jumyssyzdyq deńgeıi - 4,0% boldy. Jalpy Batys Qazaqstan oblysynda esh jerde oqymaıtyn, jumys istemeıtin jastardyń úlesi – 2018 jyldyń 1 toqsanynda 2,8 paıyz. Qazirgi ýaqytta bul respýblıka boıynsha eń tómengi kórsetkish» delingen óńirdegi jastarmen jumys jónindegi resýrstyq ortalyǵy taratqan málimdemede.
2018 jyldyń alǵashqy jartysynda 3573 jas túrli qyzmet izdep, jumyspen qamtý organdaryna jolyqqan eken. Olardyń 2889-y jumysqa ornalasqan. Taratyp aıtar bolsaq, 1425 adam derekqorda bar turaqty jumysqa kirgen, 902 adam áleýmettik jumys oryndary men jastar tájirıbesine jiberilse, 562 jas qoǵamdyq jumysqa tartylǵan.
Jyl basynan beri Batys Qazaqstan oblysynda 3 myńǵa jýyq jas maman memlekettik baǵdarlamalar jáne jobalardyń ıgiligin kórgen eken. Sonyń ishinde 747 maman «Jastar tájirıbesi» baǵdarlamasy aıasynda qyzmetke alynsa, 383 maman «Dıplommen aýylǵa» attanǵan. Olarǵa tıisinshe 246,7 mln teńge kóleminde kóterme járdemaqy berilipti. Al 236 jas maman ózi barǵan aýyldarǵa tamyr jaıyp, baspanaly bolǵan, olarǵa berilgen jeńil nesıe kólemi 802 mln.teńge.
Jastardyń jumysqa ornalastyrý múmkindigin keńeıtý, jumyssyz jastardy jumysqa ornalastyrý, jumys berýshilerge – ashylǵan bos jumys oryndaryna laıyqty jumysshy irikteýge járdem berý, yqpaldasý máselelerimen BQO Jastar saıasaty máseleleri basqarmasy men BQO jastarmen jumys jónindegi resýrstyq ortalyǵy tikeleı aınalysyp otyr. Máselen, dál búgin, 20 shilde kúni «Uralsk job fair-2018» bos jumys oryndary jármeńkesi ótip jatyr. Onyń nátıjesi sál keıin belgili bolady.
Qazbek QUTTYMURATULY
«Egemen Qazaqstan»
Batys Qazaqstan
Sýretti túsirgen Aıbatyr NURASh
