«Elimiz boıynsha shomylýǵa arnalǵan qalalyq jáne jekemenshik jaǵajaılar anyqtalǵan. Bul jerlerde TJK bólimshelerinde arnaıy daıarlyqtan ótken qoǵamdyq qutqarýshylar esebinen obektilik qutqarý beketteri qurylǵan. Sý aıdyndarynyń qaýipti jáne kúzetilmeıtin ýchaskelerinde qutqarýshylar TJK mobıldi qutqarý beketterin uıymdastyrdy. TJD ákimdiktermen birlesip shomylýǵa tyıym salynǵan jerlerdi belgiledi. Bul jerlerge 3 myńnan astam tyıym salý jáne eskertý belgileri ornatyldy. Alǵash ret bıyl elimiz boıynsha profılaktıkalyq jumys júrgizý úshin eriktiler uıymdary tartyldy. «Jas Otan» jastar qanatymen birge tıisti jospar-keste bekitildi. Atap aıtqanda, barlyǵy 2 myńnan astam volonter tartyldy. Olar 330 aksııa ótkizýge, 200 beınematerıal ázirleýge qatysty, 123 myń úgit ónimi taratyldy. Halyq arasynda 300 myńnan astam úgit ónimderi paraqshalar, jadynamalar, broshıýralar úlestirildi. Máselen, aǵymdaǵy jylǵy sáýirden 16 shildege deıin 5 myńnan astam reıd júrgizildi», dedi ol.
Sonymen birge qabyldanyp jatqan sharalarǵa qaramastan, shomylýǵa arnalmaǵan sý aıdyndarynda adamdardyń qaza bolý faktileri tirkelgeni týraly aqparat berildi. Bul rette sýǵa batqandardyń 85 paıyzy shomylý maýsymynyń basynda tirkelgen.
«Elimizdiń sý aıdyndaryndaǵy oqys jaǵdaılardyń negizgi sebepterine toqtalyp ótelik. Birinshi, óz kúshterin tolyq baǵalamaý, qatty aǵys, aıaq-qoldarynyń qurysýy, balyq aýlaý kezindegi erejelerdi saqtamaý, sý aıdyndarynyń mańynda qaraýsyz qalǵan balalardyń sýǵa túsip ketýi, júze bilmeý, mas kúıinde shomylý, júzý quraldarymen serýendegen kezde sýǵa ketý jıi kezdesedi», dedi ol.
Vıse-mınıstr el azamattaryn sý aıdyndaryndaǵy qaýipsizdik qaǵıdalarynyń talaptaryn saqtaýǵa shaqyrady.
«Birinshi kezekte tyıym salynǵan jáne jabdyqtalmaǵan oryndarda shomylmaýǵa, masań kúıinde sýǵa túspeýge, qaıyqtardan, katerlerden, aılaqtardan, sondaı-aq beıimdelmegen qurylystardan sýǵa sekirmeýge, júzý shegin bildiretin qaltqy belgilerden aspaýǵa, júzýge arnalmaǵan zattardy paıdalanyp júzbeýge, tehnıkalyq jáne eskertetin belgilerge, qaltqylarǵa minbeýge, balalarǵa eresekterdiń qaraýynsyz sýǵa túspeýge keńes beremiz», dedi Ishki ister mınıstriniń orynbasary.
Raýan QAIDAR,
«Egemen Qazaqstan»
