Saltanatty rásimde oblys ákiminiń orynbasary Aına Mysyrálimova Elbasy Nursultan Nazarbaevtyń «Bolashaqqa baǵdar: rýhanı jańǵyrý» baǵdarlamalyq maqalasynan týyndaıtyn mindetter jaıyn saralap aıta kele, eń aldymen el tarıhyn ekshep, zamandastarymyzdyń nazaryna usynýdyń aıryqsha mańyzdy ekendigine toqtaldy. Árkim óziniń týǵan ólkesiniń ótken tarıhyn sanamen salmaqtap, qapysyz tanı bilgeni jón. Osy oraıda, búgingi kóshpeli kórmede oblystyń 17 aýdany men eki qalasynyń kóne tarıhy kórinis tapqandyǵyn aıta ketken jón. Ár aýdan boıynsha jiktelgen kórme paraqshalarynda ýaqyt tabynan sarǵaıǵan mańyzdy qujattar qoıylypty. Kóne sýretter ýaqyt tabymen kómkerilgen syr kómbesin aıqara ashyp, kórermenniń kóz aldyna kóne dáýirdiń tynys-tirshiligin jetkizip tur. Derek pen dáıek tolymdy.
– Kórmeni arhıv qoımasyndaǵy buryn-sońdy el nazaryna túse bermegen sony derektermen baıyttyq, – deıdi basqarma basshysy Marzııat Tohaeva, –bul joba oblys turǵyndaryna esten shyǵa bastaǵan eski kezeńniń kózdiń qarashyǵyndaı saqtalyp qalǵan derekteri arqyly aqıqat tarıhtyń taǵylymyn usynatyn bolady. Sol arqyly biz ár óńir turǵyndaryna Kókshetaý men Qaraótkeldiń keń dalasyn jaılaǵan jalpaq eldiń bir ǵasyrlyq tarıhyn taldap, uǵyndyra otyryp, tutastyqty qalyptastyrýǵa tyrysamyz. Birinshi kezekte kóshpeli kórme árbir aýdanda bolyp, kópshilikti jádigerlermen tanystyratyn bolady. Bul jerde eldiń ótkeni ǵana emes, búgini de bar. Táýelsizdik jyldaryndaǵy jasampaz eldiń jarqyn eńbegi de keńinen kórinis tapqan.
Kópshilik tarapynan «Rýhanı jańǵyrý» baǵdarlamasy boıynsha qolǵa alynyp jatqan jobalardyń barysy aıtarlyqtaı qyzyǵýshylyq týǵyzdy. Kóshpeli kórmeniń alǵashqy sapary Zerendi aýdanynan bastalatyn bolady.
Baıqal BAIÁDIL,
«Egemen Qazaqstan»
Aqmola oblysy
