Konferensııa barysynda sheteldik seriktester men qonaqtar AEA rezıdentteriniń erekshe sharttarymen, sátti iske asyrylǵan jobalarmen, aldaǵy josparlarmen jáne damý tájirıbesimen tanysty.
«Búgingi ótkizilip jatqan shara «Ońtústik» AEA basqarýshy kompanııasynyń, AEA rezıdentteriniń, ýákiletti memlekettik organdardyń, sondaı-aq áleýetti otandyq jáne sheteldik ınvestorlardyń tikeleı kelissózder júrgizýine arnalǵan alań, bul óz kezeginde elimizdegi arnaıy ekonomıkalyq aımaqtardyń qyzmetin jetildirýdi jalǵastyrýǵa múmkindik beredi», - dedi B. Qaneshev.
Shara barysynda tikeleı sheteldik ınvestısııalardy tartýdyń ózekti máseleleri, memlekettik qoldaý sharalary jáne arnaıy ekonomıkalyq aımaqtar men ındýstrıaldy aımaqtardy damytýdyń tıimdi joldary talqylandy.
Sondaı-aq, forým aıasynda AEA damytý týraly zań jobasyn jáne problemalyq máselelerdi talqylaý boıynsha dóńgelek ústel ótkizildi, onda oń halyqaralyq tájirıbeni eskere otyryp, AEA basqarý kompanııalarynyń ózin-ózi qamtamasyz etý máseleleri qozǵaldy.
Bul shara saraptamalyq uıymdar, memlekettik organdar, AEA jáne IA basqarý organdary arasyndaǵy ózara tıimdi yntymaqtastyqqa jáne iskerlik qarym-qatynastardy nyǵaıtýǵa arnalǵan dıalogtyq alań bolmaq.
Eske sala keteıik, óńirlerdiń qarqyndy damýyn jandandyrý, tehnologııalar, ınvestısııalar tartý, tıimdiligi joǵary jáne básekege qabiletti óndiris oryndaryn qurý maqsatynda Memleket Basshysynyń Jarlyǵymen Qazaqstan Respýblıkasynda 11 arnaıy ekonomıkalyq aımaq quryldy. О́ńirlerdi klasterlik damytý maqsatynda AEA túrli salalyq baǵyttarǵa ıe. Máselen, «Ońtústik» AEA toqyma óndirisi men hımııaǵa, munaı hımııasyna, «ITP» AEA aqparattyq tehnologııalarǵa, «Pavlodar» AEA hımııa men munaı hımııasyna, «Saryarqa» AEA metallýrgııa men aýyr mashına jasaýǵa mamandandyrylǵan.
