«Memleket basshysy jas ári talantty, Qazaqstan men álemniń súıispenshiligine bólenip úlgergen, bolashaǵynan zor úmit kúttirgen Denıs Tenniń baqılyq bolýyn aýyr qaıǵymen jáne zor kúızelispen qabyldady. Prezıdent Qazaqstanda mánerlep syrǵanaýdyń negizin qalaǵan jáne elimizdegi sporttyń damýyna zor úles qosqan Denıstiń jaqyndary men týystaryna kóńil aıtý jedelhatyn jiberdi», - dedi Aıdos Úkibaı.
Nursultan Nazarbaev jastarǵa úlgi bola bilgen tamasha uldy, óz eliniń naǵyz patrıotyn tárbıelep ósirgen Denıs Tenniń ata-anasyna qońyraý shalyp, kóńil aıtqan.
«Memleket basshysy Denıstiń mezgilsiz dúnıeden ótýi - jaqyndary men týystary úshin ǵana emes, tutas memleket úshin orny tolmas qaza ekenin jetkizdi. Mánerlep syrǵanaýshynyń ata-anasyna kóńil aıta otyryp, Prezıdent qylmyskerlerdiń jazasyz qalmaıtynyn basa aıtty», - dedi Elbasynyń Baspasóz hatshysy Aıdos Úkibaı.
