Áıgili sportshyny eske alý sharalary keshe elimizdiń basqa qalalaryndaǵydaı О́skemen men Semeı shaharlarynda da ótti.
О́skemendikter keshe keshki saǵat 8-den bastap, Borıs Aleksandrov atyndaǵy sport saraıynyń aldyna jınalyp, sportshy sýretiniń aldyna shyraq tutatyp, eske alý rásimin jasady. Mánerlep syrǵanaýdyń has sheberin eske alýǵa jınalǵan jurttyń arasynda ásirese jastardyń qarasy mol boldy.
Shyǵys Qazaqstanǵa jumys saparymen kelgen «Jas Otan» jastar qanatynyń atqarýshy hatshysy Dáýlet Káribekti kópshilik arasynan kezdestirip, sózge tartqanymyzda Denıs Tenmen 2015 jyly respýblıkalyq Jastar forýmyn ótkizgen kezde tikeleı jumys istegenin, sol sharaǵa daıyndyq kezinde sportshynyń adamgershiligine tánti bolǵanyn aıtty. «Kóptegen tanymal jastarmen birge ol da Elbasy aldynda sóz sóılegeni esterińizde bolar. Daıyndyqqa keshikpeı, eshkimdi áýrelemeı-aq kelip júrdi. Eńbegin, esimin buldaý degen múlde bolǵan joq. Moınyna alǵan mindetine asqan jaýapkershilikpen qaraıtynyn kórdik. О́zine jeke bólme surap alyp, aıtatyn sózin pysyqtap, daýsyn shyǵara sóılep, daıyndalatyn. Forým taıaǵan sátte sóz sóıleýi tıis qyzdardyń keıbiri qatty qobaljydy. Sol kezde Denıs Ten álgi qurdastaryna tátti bálishter ákep berip, kóńilderin aýlaǵan bolatyn. Dálizde kezdese qalsaq ta, bárimizge pozıtıv syılap, mańaıyn jigerlendirip júrdi. Sóıtken áıgili zamandasymyzdan shańqaı túste kóz jazyp qalǵanda, tóbemizden jaı túskendeı boldy. Ol barsha jastardyń jadynda jarqyn bolmysymen qalady» - dedi ol.
Semeıdegi eske alý sharalary Ertistiń jaǵalaýynda ótti. Júzdegen semeılikter sportshynyń sýretiniń janyna shyraq jaǵyp, gúl shoqtaryn, keıbiri Denıstiń óner kórsetken sýretterimen birge oıynshyqtardy qoıyp, esil erdi únsizdikpen eske aldy. «Ol uly sportshy, talantty bapker boldy. Denıs kóptegen talantty balalardy mánerlep syrǵanaýǵa baýlyp júr edi. Biraq sońyna jete almady. Semeıdiń sportshy qaýymy onyń ata-anasyna, jaqyn-jýyqtaryna qaıǵyryp kóńil aıtady», - dedi Semeıde ótken eske alý aksııasyna qatysqan aýyr atletıkadan jattyqtyrýshy Vıacheslav Lıý-Shın.
Azamat QASYM,
«Egemen Qazaqstan»
Shyǵys Qazaqstan oblysy
