Beıneekran arqyly Denıs Tenniń ómiriniń jarqyn sátteri kórsetildi. Abzal ulmen qoshtasýǵa aǵylǵan halyq sýretine gúl qoıdy.
- Aýyr qaıǵy, Denıs endi qaıtyp oralmaıdy. Ol az ǵana ǵumyrynda ózindik mektebin qalyptastyryp úlgerdi, jasyndaı jarqyrady. Qazaqstannyń atyn álemge tanytty. Denıstiń ata-ana, týǵan-týystarynyń qaıǵylaryna ortaqpyz, - dedi oblystyq dene shynyqtyrý jáne sport basqarmasy basshysynyń mindetin atqarýshy Nurjaýǵan Tóleýova.
Denıspen qoshtasýǵa oblystyq, qalalyq ákimdikten, «Nur Otan» partııasy, Qazaqstan halqy Assambleıasynyń oblystyq bólimshelerinen ókilder keldi, qala turǵyndary da Muz saraıyna baryp, qurmet kórsetti.
Aıta keteıik, bıylǵy sáýir aıynda Olımpıada júldegeri Denıs Ten Atyraýdaǵy muz saraıyna arnaıy kelip, jas mánerlep syrǵanaýshylarǵa sheberlik saǵatyn ótkizgen edi. Denıs ómirden ótti degen habardy estigeli oblys ortalyǵynda ǵana emes, aýdandarda da jastar jınalyp, jas sańlaqtyń rýhyna qurmet kórsetý sharalaryn uıymdastyryp jatyr.
Qazaqtyń týyn bıikke kóterip, «Bolmysym-qazaq» dep ótken jas qyrannyń esimi umytylmaıdy. Sen máńgi júregimizdesiń, Denıs!
Baqytgúl BABASh,
«Egemen Qazaqstan»
ATYRAÝ
Sýretti túsirgen: Ilııas Shaıhıev
