Kitap festıvali Astana qalasy ákimdiginiń, QR Prezıdentiniń halyqaralyq «Bolashaq» stıpendııasy stıpendıattary qaýymdastyǵynyń, «Astana jastary» jastar resýrstyq ortalyǵy jáne Astana qalasynyń ortalyqtandyrylǵan kitaphanalar júıesiniń uıymdastyrýymen ótti.
Elordadaǵy alǵashqy «Astana Kitap Fest» festıvaliniń maqsaty – halyq arasynda kitap oqýdy dáripteý, qalalyqtardyń kitap mádenıeti deńgeıin joǵarylatý. Atalmysh shara aıasynda elordanyń «Arbatynda» kitap almasý uıymdastyryldy. Turǵyndardyń biri ózine unaǵan kitapty eshqandaı aqy tólemeı úıine alsa, endi biri kerisinshe oqyp shyqqan kitabyn qoǵamdyq sórede qaldyrǵan bolatyn.
«Bolashaq» qaýymdastyǵynyń atqarýshy dırektory Laýra Demesinovanyń aıtýyna qaraǵanda, mundaı sóreler qalalyqtar úshin tańsyq dúnıe emes. Astananyń kóptegen saýda ortalyqtarynda jumys isteıtin qoǵamdyq kitap sóreleri búgin halyqtyń jaqsy baǵasyn alyp úlgergen.
«Bizdiń Qaýymdastyqtyń bastamasymen Astanada byltyrdan «Volashak books» jobasy iske asyrylyp keledi. Bul – áleýmettik bilim berý jobasy. Búgingi tańda qoǵamdyq kitap sóreleri «Saryarqa», «Hanshatyr», «AjarMall», «Azııa park», «Kerýen» sııaqty saýda ortalyqtarynda bar. Jobamyz, ásirese, óskeleń urpaq ókilderiniń arasynda keńinen tanymal, suranysqa ıe. Kitaptar qashanda qoljetimdi bola bermeıdi ǵoı?! Biz jastardyń tegin oqý, damý, jańashyldyqtardy taný múmkindiginiń bar ekendigin kórsin deımiz. Tabysty túrde júzege asyp jatqan joba bolashaqta da óz jalǵasyn tabady», - dep alǵa tartty Laýra Demesinova.
Sonymen qatar, «Astana Kitap Fest» kitap festıvaliniń aıasynda qala turǵyndary men qonaqtary túrli salada zor jetistikterge qol jetkizgen ataqty astanalyq tulǵalarmen kezdesti. «Talap» qoldanbaly zertteý ortalyǵynyń dırektory Rahym Oshaqbaev, «Daryn» akademııasy men «Jastar» fýtbol klýbynyń negizin qalaýshy Ádil Igemberdıev pen «Tomırıs» fılminde basty róldi somdaǵan aktrısa Almıra Tursyn Bookdating alańynda jınalǵandarǵa ózderi tamsana oqyǵan kitaptary, súıikti avtorlary jaıly aıtyp berdi.
Aıta keteıik, Book Dating aıasyndaǵy mundaı keshter elordada úsh jyl qatarynan aı saıyn ótkizilip keledi.
