Joqtaý aıtqan jurttyń júregi tynshý tabar emes. Aınadaı aıdynda synaptaı syrǵyp óte shyqqan ómirińdegi jetistigińdi jipke tizip qana kólkigen kóz jasyn syǵyp, kóńilin aldarqatqan bolady. Denıs Tenniń eline bergeninen bereri, áli de eńserer belesi kóp edi. О́kinishke qaraı, Almaty qalasynyń qaq ortasynda qanypezerlerdiń qolynan qapyda qaza tapty. Ajalǵa arasha túsken dárigerler baryn salyp baqqanmen, sańlaqtyń ómirin saqtap qala almady. Qazaqtyń uranyna, ulttyń ulanyna aınalǵan uly sportshy qamshynyń sabyndaı ǵumyrynda atyn kúlli álemge áıgilep ketti. Qazaqstan sporty tarıhynda mánerlep syrǵanaýdan halyqaralyq dodalarda buǵan deıin oza shaýyp, olja salǵan eshkim bolǵan joq. Denıs - jeńis tuǵyrynan túspegen saıypqyran edi.
Tekti týǵan Ten - halyqaralyq dárejedegi sport sheberi. Ol 2010 jyly Kanadanyń Vankýver qalasynda ótken HHI qysqy Olımpıada oıyndarynda óner kórsetip, mánerlep syrǵanaýdan fınaldyq kezeńge ótken Qazaqstannyń tuńǵysh sportshysy. 2013 jyly álem chempıonatynyń kúmis júldegeri atandy. 2014 jylǵy qysqy Olımpıada oıyndarynda jáne 2015 jylǵy jahandyq jarysta qola medalǵa qol jetkizdi. Mánerlep syrǵanaýdan tórt qurlyq dodasynyń, VII qysqy Azııa oıyndarynyń jáne Qazaqstannyń úsh dúrkin chempıony. Halyqaralyq konkıshiler qaýymdastyǵy reıtınginde úzdik úshtikti túıindedi.
Birtýar sport sheberi "Denıs jáne onyń dostary" dep atalǵan dástúrli ǵalamat shoýyn bıyl tórtinshi márte ótkizip, Astananyń 20 jyldyq mereıtoıyna arnady. Tamasha qoıylym kórsetýge Reseı, Fransııa, AQSh, Kanada, Qytaı men Japonııadan mánerlep syrǵanaýdyń jumyr jerdegi juldyzdary keldi. «Barys Arenadaǵy» keremet keshte ol erekshe erik-jiger, tyń serpinmen óner kórsetti. Bul onyń muz aıdyndaǵy erkin samǵaǵan eń sońǵy sáti eken.
Iá, onyń jaraqaty janyna batsa da, el namysy úshin dodalarda dara shapqan shaǵy kóp. О́zimdi almastyratyn syrǵanaýshy bolsa eken deýmen esil er armanda ketti. Osy olqylyqtyń orynyn toltyrý úshin ózimen óksheles órenderge bar ónerin úıretip baqqan Denıs 2010 jyly sheberlik synybyn ótkizýdi bastaǵan bolatyn. Bala shaqtan balań arman alǵa jetektegen albyrt jastar arasynan álemdik dodalarda ánuranymyzdy áýeletip, alǵy shepten kórinetin sheberler shyǵatynyna kámil senetin. Átteń, mezgilsiz ajal mejege jetkizbeı, qaǵilez qara bala qapyda mert boldy.
Barsha Qazaqstan halqyna ortaq qaıǵyly qazaǵa qabyrǵasy qaıysyp, azaly oı tolǵaǵan torǵaılyq aqyn Saıat Ábenniń óleńi ólimge ózegi órtengen jurttyń óksigin jetkizip turǵandaı:
О́tkinshi ómir deıtin maıdanda bul,
Soǵaryn kim biledi qaıdan daýyl?!
Kóliktiń aınasy úshin ajal qushty,
Qazaqtyń aınasyna aınalǵan ul.
Eriksiz kózimizge jas keledi,
Elime arnalatyn basty óneri.
Máńgilik qosh aıtysty ómirmenen,
Mánerlep syrǵanaýdyń has sheberi.
Aınadaı aıdynda aıqyn iz qaldyrǵan altyn asyqtaı ul sharyqqa ustaǵan sharbolattaı lypyp turýshy edi. Jasyndaı jarq etken jas ǵumyr nebári jıyrma besinde qyrshynynan qıyldy. «Jazmyshtan ozmysh joq». El bop eńirep, jurt bop joqtasaq ta muzdaǵy muzbalaqtyń oryny oısyrap turary ókinishti! Jarqyn beıneń jasampaz halqymyzdyń jadynda jattalyp, sanasynda saqtalyp qalary haq. Seniń bıik tuǵyrdaǵy tuma bulaqtaı tunyq tulǵań ózińe qarap boı túzegen bolashaq chempıondar úshin boıtumar bolary sózsiz. Desek te... Denıs... jeńis jolyna jetelegen jetkinshekter ultymyzdy ulyqtaıtyn uly muratyńa jetkizeri Aıdan anyq!
Aspan bultsyz bolmaıdy,
Bultty jaryp Kún shyǵar!
Aıdynǵa órnek salatyn
Qazaqtan sendeı ul shyǵar!
.... Baqul bol, qazaqtyń Denısi!
Amangúl Ermekqyzy,
Serik Ábdýáli,
«Qazaq radıolary» JShS ujymy atynan
