Jańa járdemaqyny kimder alady?

Elbasy Joldaýynda «2018 jyldyń 1 shildesinen bastap kámeletke tolǵan, bala kezinen birinshi toptaǵy múgedekterdi ba­ǵyp otyrǵan ata-analar úshin qo­symsha memlekettik járdem­aqyny engizýdi tapsyramyn», degen bolatyn. 

Soǵan sáıkes, járdemaqynyń mólsheri aǵymdaǵy jyly eń tómengi kúnkóris deńgeıinen 1,05 nemese 29 699 teńgeni quramaq. Sondaı-aq járdemaqy 18 jas­tan asqan, bala kezinen birinshi toptaǵy múgedekke kútimdi júzege asyratyn adamdarǵa tólenedi. Atap ótken jón, barlyq tıisti áleýmettik tólemder múgedekter úshin saqtalady. Járdemaqy bala kezinen birinshi toptaǵy múgedek nemese onyń zańdy ókili júgingen kúnnen bastap bala kezinen birinshi toptaǵy múgedektik belgilengen barlyq kezeńge taǵaıyndalady.

Eńbek jáne halyqty áleý­met­tik qorǵaý mınıstrligi ókil­deriniń aıtýynsha, jańa format­taǵy júıe áleýmettik kómekti kú­sheıtýdi, beriletin járdem­aqy­lardy biriktire otyryp, azamattar úshin ońtaılandyrýdy jáne olardyń mólsherin kóbeıtý máselelerin sheshetin bolady. «Balaly otbasylarǵa beriletin memlekettik járdemaqylar týraly» zańǵa birinshi toptaǵy múge­dekke bala kezinen kútim jasaıtyn 18 jastan asqan adamdarǵa arnalǵan jańa járdemaqyny engizý normalary bekitildi», dedi mınıstr M.Ábilqasymova.

Járdemaqynyń ómir boıyna taǵaıyndalatyny da jarymjan jandarǵa moraldyq ári ma­te­rıaldyq kómek dep bilýimiz kerek. Tek kámeletke tolmaǵandar, júıke aýrýy men narkologııalyq dıspanserde tirkeýde turǵandar qamqorshy bola almaıdy. So­ny­men qatar sot áreketine qa­biletsiz nemese qabilettigi shek­teýli dep tanylǵandarǵa da mú­gedekke kútim kórsetý boıynsha járdemaqy tó­lenbeıdi.

Áleýmettik kómek departa­menti dırektorynyń orynbasa­ry Baljan Baıaha­to­vanyń aı­­­­týyn­­­­­­sha, bir otbasynda eki mú­ge­dek bol­­­sa, múge­dekti baǵyp otyr­­­­ǵan ár adamǵa járdemaqy tó­lenedi. Ot­ba­syn­da eki ne odan da kóp ba­la I top­ta­ǵy múge­dek bolatyn bol­sa, jár­de­m­aqy ár­qaısysyna tó­le­nedi. «Eger de olardy bir emes, bir­ne­she adam baǵyp otyratyn bolsa, tek sol baǵyp otyrǵan adam­ǵa tó­le­nedi», deıdi ol. Aldaǵy ýaqytta atalǵan áleý­­­mettik kómekti 14 myńnan as­­tam otbasy alady dep kúti­lýde. Bu­ǵan deıin I toptaǵy múm­kindigi shek­teý­li jandar 18 jas­qa tolǵan soń olar­dyń ata-analaryna tólenetin jár­demaqy toqtatylatyn.

Jaqsy jańalyqqa Astana qa­l­a­synyń turǵyny Naǵıma Ju­mabek esimdi ana óz rızashy­ly­ǵyn bildirdi. Onyń 28 jastaǵy uly Erjan – I toptaǵy múgedek. «Balamdy baǵyp-qaǵýǵa shamam jet­kenimen, kútimine qarajat ke­rek. Memlekettiń osyndaı jan­dar­ǵa qamqorlyq jasaǵany óte qup­tarlyq is. Eger onyń ózi­niń den­saýlyǵy jaqsy bolyp, ju­mys istep sol qarajatty ózi tapsa, odan artyq baqyt bolmas edi. Bi­raq múgedek bolǵan soń úıde otyr. Oǵan kúndiz-túni kútim kerek. Qaraýsyz qaldyrýǵa bol­maıdy. Aspaz bolyp túngi aýysymda is­teımin. Kúndiz men, túnde ákesi qaraıdy. Byltyr páter aldyq. Endi járdemaqy taǵaıyndalyp jatyr. Osynyń bári memlekettiń janashyrlyǵy dep bilemiz»,  deı­di Erjannyń anasy.

Taǵy bir aıta keterligi, qam­qor­­shylardy jylyna eki ret aýys­tyrýǵa bolady. Sondaı-aq olar múmkindigi shekteýli adammen birge nemese jaqyn mańda tu­rý­ǵa mindetti dep sanalady. Jańa járdemaqy sondaı-aq áıel­diń múgedek balasyna kú­tim jasaǵan jyldary zeı­net­ke shyq­qanda eńbek óti­li­ne qo­sy­la­dy. Bul maqsatqa res­pýb­lı­ka­lyq bıýd­jetten 2,7 mıllıard teńge qarastyrylǵan. Aıta ketsek, búgingi tańda ba­la kezden birinshi toptaǵy mú­ge­dek adamdarǵa beriletin me­m­­­le­­ket­tik áleýmettik jár­dem­aqy­nyń mól­sheri – 54 306 teńge.

Mıras ASAN,

«Egemen Qazaqstan»