Ala dop alamanynyń ashylý saltanatyna Azııa voleıbol konfederasııasynyń ókilderimen birge Qazaqstan voleıbol federasııasynyń prezıdenti Nurtaı Ábiqaev ta arnaıy qatysyp: «Barshańyzdy osynaý sport merekesiniń bastalýymen shyn júrekten quttyqtaımyn. Japonııa, Qytaı Halyq Respýblıkasy, Taıland, qytaılyq Taıbeı, Iran, Vetnam, Shrı-Lanka, Indonezııa elderiniń sportshylaryna, qonaqjaı qazaq eline, shuǵylaly Shyǵys jerine qosh keldińizder deımiz. Sondaı-aq bizge osyndaı aýqymdy sharany taǵy bir márte ótkizý mindetin senip tapsyrǵan Azııa voleıbol konfederasııasy basshylyǵyna rahmet aıtamyz. Qurlyqtyń myqtylary qatysatyn jarys tartysty da qyzyqty oıyndarǵa toly bolady dep senemiz», dep óz quttyqtaýyn jetkizdi.
Jarys aldynda ótken baspasóz máslıhatynda óskemendik «Altaı» komandasynyń bas bapkeri Iýrıı Panchenko oıyn ońaı bolmaıtynyn, negizgi báseke bir jyl burynǵydaı Taıland, Japonııa, Qytaı jáne Qazaqstan komandalary arasynda órbıtinin aıtqan-dy. «Mundaı baıraqty básekeniń eki jyl qatarynan bir elde, bir qalada ótkizilýi kóp nárseni ańǵartsa kerek. О́z basym byltyrǵy birinshilikti kórmesem de bıylǵy doda uıymdastyrylýy jaǵynan odan asyp túsetinine senemin.
Oblys basshylyǵy aldymyzǵa kem degende fınalǵa shyǵý mindetin qoıyp otyr. О́ıtkeni О́skemen qalasy Álem birinshiligin de ótkizýge qamdanyp jatyr. Demek, biz bıylǵy dodada joǵary nátıje kórsetip, sol jahandyq saıysqa joldama alýymyz kerek. Qalaı degende de, jankúıerlerimizdiń senimin aqtaǵymyz keledi», degen edi bas bapker. «Altaıdyń» kapıtany Sana Anarqulova: «Byltyrǵy jarysqa daıyndyǵymyz nasharlaý bolǵany ras. Alaıda bıyl bári kerisinshe, Túrkııaǵa baryp, nátıjeli oqý-jattyǵý jıyndaryn ótkizip qaıttyq. Sonymen qatar komandaǵa birqatar beldi oıynshy kelip qosyldy», dep bıyl byltyrǵydaı emes, saıysqa saqadaı saı ekendikterin jetkizgen-di.
Baspasóz máslıhatynda chempıonattyń byltyrǵy jeńimpazy, Taı eliniń atynan synǵa túsetin «Sýprım» komandasynyń bas bapkeri Nataphon Srısamýtnak birdeńe sezgendeı «byltyrǵy jetistigimizdi qaıtalaýǵa tyrysamyz. О́z komandamnyń jeńiske jetetinine shamamen 80 paıyzǵa senemin» dep ózderine senimdiligin ańǵartqan edi.
Sonymen, 8 kúnge sozylǵan saıys aıaqtalyp, jeńimpazdar anyqtaldy. О́kinishke qaraı, «Altaı» qyzdary byltyrǵy qarsylastaryn aınalyp óte almady. Tórtinshi oryndy ıelendi. Byltyrǵy ssenarıı bıyl da tup-týra qaıtalandy deýge bolady. Taılandtyq «Sýprım» – 1, japonııalyq «NEK Red Rokets» 2-oryndy qanjyǵalaryna baılasa, úzdik úshtikti Qytaı eliniń «Szıansý» komandasy túıindedi.
Dúbirli dodanyń jabylý saltanatyna aımaq basshysy Danıal Ahmetov arnaıy qatysyp, oıynshylarǵa jyly lebizin bildirdi. «Búgin áıelder komandalary arasyndaǵy klýbtyq Azııa chempıonaty aıaqtalyp otyr. Bir apta buryn sportshylarymyz óz eliniń namysy úshin aıqasýǵa daıyn edi. Endi olar dosqa aınaldy. Aptaǵa sozylǵan voleıbol merekesine qatysqan barshańyzdy shyn júrekten quttyqtaımyn. Sportshylarǵa demeý bolǵan jankúıerlerge de erekshe alǵysymdy aıtamyn», dedi oblys ákimi.
Dop dodasynyń jabylý saltanatynda jekeleı esepte joǵary deńgeıli oıyn kórsetken sportshylar arnaıy marapatqa ıe boldy. Chempıonatqa arnaıy daıyndalǵan medaldar eń úzdik ujymdarǵa tabystaldy. Onyń ishinde «Sýprım» voleıbolshylary «Baıterek» úlgisindegi Kýbokke ıelik etti. Sonymen qatar «Sýprım» komandasynyń oıynshysy Konot Aıcharaporn – «Úzdik oıynshy», Olga Drobyshevskaıa («Altaı»), Konot Aıcharaporn («Sýprım»), Hıroshı Nanamı («NEK Red Rokets») – «Úzdik shabýylshy», Natalıa Sharshakova («Altaı»), Chenıý Vang («Szıansý») – «Úzdik ortalyq tosqaýylshy», Vankıanbaı Rong («Szıansý») «Úzdik baılanystyrýshy» jáne Saıaka Ivasakı («NEK Red Rokets») «Úzdik lıbero» nomınasııalarymen marapattaldy.
Azamat QASYM,
«Egemen Qazaqstan»
О́SKEMEN
