«Atalǵan zańdar azamattardyń bilikti zań kómegin alý kezindegi konstıtýsııalyq quqyǵyn iske asyrýda olardyń quqyqtaryn, bostandyqtary men zańdy múddelerin qorǵaýdy nyǵaıtýǵa, sondaı-aq bilikti zań kómegin kórsetý mehanızmderin jetildirýge baǵyttalǵan. Zańmen azamattardyń konstıtýsııalyq quqyqtaryn júzege asyrýǵa jáne kelesi máselelerdi sheshýge baǵyttalǵan birqatar sharalar kózdelgen. Bul – zań kómegin zańger mamandarynyń ókilderimen jetkiliksiz sapada kórsetý, azamattardy josyqsyz advokattar men jeke tájirıbemen aınalysatyn zańgerlerdiń áreketterinen qorǵaý mehanızminiń bolmaýy, bilimniń jyldam eskirýi jáne biliktilikti turaqty kóterý qajettiligi, advokattardyń tapshylyǵy, advokattar alqalarynyń qyzmetinde ashyqtyq pen aıqyndyqtyń bolmaýy sııaqty máseleler.
Zańmen quramynda 6 advokat, qoǵamnyń 3 ókili jáne otstavkadaǵy 2 sýdıasy bar tártiptik komıssııalardyń eki deńgeıli júıesi kózdelgen. Bul azamattardyń shaǵymdaryn obektıvti jáne jan-jaqty qarastyrýdy, ashyqtyq pen aıqyndyqty qamtamasyz etedi. 2020 jyldan bastap advokattardyń, zań konsýltanttarynyń kásibı jaýapkershiligin mindetti saqtandyrý engiziledi. Bul senim bildirýshilerge bilikti zań kómegin alýǵa jáne sapasyz zań kómegi kórsetilgen jaǵdaıda keltirilgen zııandy óteýge kepildik beredi. Sonymen qatar zańnama turǵysynan jeke tájirıbemen aınalysatyn zańgerlerdiń quqyqtyq mártebesi, quqyqtary men mindetteri bekitiledi.
Búgingi tańda sotta azamattyń múddesin joǵary zań bilimi bar kez kelgen adam bildiredi, osy rette osyndaı kómek jıi sapasyz kórsetiledi. Sondyqtan sotta azamattardyń múddesin bildiretin tulǵalar úshin zań konsýltanttar palatasynyń múshesi bolý mindeti kózdelgen, bul sózsiz Qazaqstandaǵy zań qyzmetterin kórsetý naryǵynyń damýyna, zań kómeginiń sapasyn jáne básekege qabilettiligin kóterýge sebep bolady», dedi Ádilet mınıstriniń orynbasary Janat Eshmaǵambetov.
Ol zańnyń negizgi maqsaty zań kómeginiń ashyqtyǵyn, ádildigin jáne sapasyn kóterý bolyp tabylatyn birqatar basqa da jańashyldyqtardy qamtıtynyn, Zań normalary halyqqa joǵary biliktiligi bar mamandarmen sapaly jáne qoljetimdi zań kómegin kórsetýge baǵyttalǵanyn atap ótti.
Raýan QAIDAR,
«Egemen Qazaqstan»
