Bul májiliske Batys Qazaqstan oblystyq sotynyń alqa tóraǵasy, oblystyq sot sýdıalary, aýdandyq jáne olarǵa teńestirilgen sottardyń tóraǵalary qatysqan bolatyn. Oblystyq sottyń alqa tóraǵasy Qaırat Adranov jıyn basynda qazirgi Qazaqstannyń sot júıesi men burynǵy dástúrli qazaq qoǵamynyń sot tóreligi arasynda uqsastyq baryn, bıler soty daýlardy sheshý kezinde tatýlastyrý rásimderine basa mán bergenin aıtyp ótti. Eki jaqtyń daý aldynda ymyraǵa kelýin qazirde medıasııa dep atap júrmiz.
- Kóshpeli qazaq qoǵamyndaǵy bıler keńesi – memlekettik mańyzdy máselelerdi sheshken mańyzdy organnyń biri boldy. Eger bıler keńesiniń qalyptasýy men damýy tarıhyna tereń úńiletin bolsaq, bul júıe ejelgi kóshpeli daladaǵy dástúrdiń jalǵasy ekendigin kóremiz. Bıler tek jeke daýlar boıynsha sheshim shyǵaryp qoıǵan joq. Olar mámileger, basqarýshy, aıyptaýshy jáne qorǵaýshy retinde de ádildik ornatty, ol úkimniń durystyǵyna kópshilik kúmán keltirmedi, - deıdi oblystyq sottyń sýdıasy Esenbaı Boranbaev.
Jınalys nátıjesinde oblystyq sot tóraǵasy Bek Ametov aýdandyq sottarǵa aýyldyń aqyldy ári syıly aqsaqaldarynan turatyn bıler keńesterin qurýdy tapsyrdy. Al Qaırat Adranov «Medıasııa týraly» QR Zańyn basshylyqqa ala otyryp, ár aýdanda bılerdi saılaýdyń ortaq erejesin ázirleýdi jáne olardy deldal retinde usyný máselesin kóterdi. Jıyn sońynda atalǵan máseleler boıynsha naqty nusqaýlar berildi. Bul nusqaýlardyń oryndalýy aýdandyq jáne teń sottardyń tóraǵalaryna tapsyryldy. Al oblystyq sot sýdıasy Esenbaı Boranbaev óńirdegi bı keńesin qurý jónindegi úılestirýshi bolyp taǵaıyndaldy.
Qazbek QUTTYMURATULY
«Egemen Qazaqstan»
Batys Qazaqstan
