Osy boıynsha 310 is-sharadan turatyn jospar bekitilgen. Oblys ákimi Qyrymbek Kósherbaevtyń tóraǵalyǵymen ótken apparat májilisinde atalǵan jospardyń qalaı oryndalyp jatqandyǵy jóninde oblystyq energetıka jáne bıýdjetti josparlaý basqarmasynyń basshysy Sáýle Qulymbetova baıandap berdi. Taldaýda kórsetilgendeı, 310 is-qımyl josparynyń ázirge 37 tarmaǵy naqty oryndalǵan, 3 tarmaq boıynsha jumystar aıaǵyna jetkizilmegen. Al 270-tarmaqtyń 56-sy uzaq merzimdi is-shara bolǵandyqtan ázirge ashyp aıtý qıyn. Biraq jyl aıaǵyna deıin 214-i oryndalmaq. Oǵan negiz bar.
Basqarma basshysy is-qımyl josparyndaǵy oryndalmaı jatqan tarmaqtarǵa toqtalyp ótti. Sonyń biri – oblystyq aımaqtyq týrıstik brendin ázirleý oblystyq kásipkerlik jáne týrızm basqarmasyna tapsyrylǵan bolatyn. Alaıda, Premer-Mınıstr Baqytjan Saǵyntaevtyń 2018 jylǵy 19 qańtardaǵy ókimi boıynsha «Qazaqstannyń eldik týrıstik brendin» ázirleý tapsyrmasy qoıylǵan. Osy sebepterge baılanysty aımaqtyq týrıstik brendin ázirleý máselesi ózektiligin joǵaltqan sııaqty.
Sonymen qatar Jańaqorǵanǵa qarasty Aqqum eldi mekenindegi 100 oryndyq mektep bıyl ekinshi toqsanda paıdalanýǵa berilýge tıis bolatyn. Merdiger ýádesinde turǵanymen mektepte ne sý, ne elektr jaryǵy joq. Oqý ornyna sý jáne elektr jaryǵyn tartatyn bas sý torabynda jóndeý jumystary júrgizilip jatqandyǵy biteıin dep turǵan qurylysqa kedergi keltirgen.
Qyzylorda qalasynyń sol jaǵalaýynda emhana qurylysyna qajetti qujattardy ázirleý de júzege aspaǵan. Úshinshi toqsanda oryndalýy tıis joba oblystyq densaýlyq saqtaý basqarmasynyń usynysy boıynsha memleket-jekemenshik áriptestigi negizinde júzege asatyn jobalar tiziminen alynyp tastaldy.
Oblys ákimi oryndalmaı jatqan jumys boıynsha jaýapty tulǵalarǵa, sala basshylaryna naqty tapsyrmalar berdi. Jaýapty tulǵalardan qatań suraý bolatynyn eskertti.
Baqtııar TAIJAN,
«Egemen Qazaqstan»
Qyzylorda oblysy
