Sondyqtan óńirde dinı aǵymdardy ustanýshylardy jumysqa ornalastyrý men kásipkerlik iske tartý jóninde is-sharalar kesheni belgilendi. Oblystaǵy lańkestikke qarsy komıssııanyń májilisinde osyndaı sheshim qabyldandy. Atalǵan komıssııanyń tóraǵasy, oblys ákimi Berdibek Saparbaevtyń ózi ekenin eskersek, komıssııa sheshimi nátıjesiz ári aıaqsyz qalmaıtynyna úlken senim artýǵa bolady.
Berdibek Mashbekulynyń málimdeýinshe, máselege dál osy turǵydan kele bilýdiń ózi áleýmettendirýdiń oń ádisi bolmaq. Al oblystaǵy din isteri jónindegi basqarmanyń derekterine súıensek, óńirde dinı aǵymdardy ustanýshylardyń arasynda 300-deı jumyssyz bar. Sondaı-aq jazasyn ótep jatqandar arasynda dinı ekstremızm men lańkestiktiń aldyn alýǵa qatysty jumystardy júıeli jolǵa qoıý qajettigi de aıqyn baıqalady. Osy oraıda Aqtóbe qalasy men Alǵa jáne Baıǵanın aýdandaryndaǵy lańkestikke qarsy komıssııalar óz isterin shırata túsýge tıis. Qysqasy, qazirgi kezde oblysta dinı ekstremızm men lańkestikke qarsy is-áreketter aýqymy arta túsýde. Mundaǵy basty maqsat kúsh qoldanýǵa emes, kerisinshe atqarylatyn jumystardyń tıimdiligin kóterýge baǵyttalǵan.
Temir QUSAIYN,
«Egemen Qazaqstan»
AQTО́BE
