Oblystyq máslıhattyń otyrysynda aımaqta júrgizilgen jumystardyń aralyq nátıjeleri sarapqa salyndy, jınalysqa oblystyq basqarmalar basshylary, ekinshi deńgeıdegi bankterdiń ókilderi qatysty. Oblys ákiminiń orynbasary Qanat Ydyrysov respýblıkalyq bıýdjetten 2019-2021 jyldarǵa arnalǵan turǵyn úı qurylysyna bólinetin qarjy esebinen «7-20-15» baǵdarlamasy boıynsha ınjenerlik kommýnıkasııa qurylysyna jospar jasalǵany týraly qatysýshylardy habardar etti.
Elbasynyń basqa bastamalary boıynsha da belsendi jumystar júzege asýda. Esepteýler boıynsha, oblystaǵy eńbekaqysy tómen 22 myń jumysshyǵa eńbekaqysyn kóterý úshin salyq azaıtylatyn bolady. Stýdentterge arnalǵan jataqhanalar salý tetikteri ázirlenýde. Qazirgi ýaqytta oblysta 2 870 stýdentti ornalastyrý úshin 11 jataqhana salý qajet. Kókshetaý qalasynyń ákimdigi 4,5 gektardan astam yńǵaıly jer telimin belgiledi. Shaǵyn jáne orta bızneske shaǵyn nesıe berýdi ulǵaıtýǵa qarjy bólý josparlanyp otyr. Sonymen qatar, gazben qamtamasyz etýdiń jol kartasy ázirlendi. Arshaly aýdanynda 40 myńnan astam adam turǵyny bar 17 eldi meken, Selınograd aýdanynda 90 myńnan astam turǵyny bar 7 eldi meken gazben qamtamasyz etiletin bolady.
Senatorlar bes áleýmettik bastamany iske asyrýǵa qatysty jıynǵa qatysýshylarǵa birqatar suraqtar qoıdy. Atap aıtqanda, D. Ádilbekov pen R.Ákimov «7-20-25» baǵdarlamasy boıynsha nesıe berý bastalǵany jáne onyń sharttary turǵyndardyń tolyq habardar etilgeni týraly surady. Depýtattardyń aıtýynsha, kezdesýler barysynda «7-20-25» baǵdarlamasy boıynsha nesıe berý kezinde jas erekshelikteriniń eskerilýine, baǵdarlamanyń aýyldyq jerlerde úı satyp alý múmkindigine, alǵashqy jarnanyń turǵyn úı baǵasynyń 20 paıyzdan asýyna qatysty saýaldar jıi qoıyldy.
Kezdesý barysynda «7-20-25» baǵdarlamasy boıynsha oblysta tek bir ǵana banktiń eki nesıe bergeni aıtyldy. Endi bólimsheler aýqymy keń iri bankterdiń qosylýy arqyly nesıelendirý aıasyn ulǵaıtý qajettigi belgili bolyp otyr. Baǵdarlamaǵa ekinshi deńgeıli jeti bank qatysýy tıis.
Baǵdarlamalyq qujattyń basqa tarmaqtary da jan-jaqty qaraldy. Oblystyq máslıhat depýtattary men memlekettik organdardyń basshylaryna bes áleýmettik bastamany naqty jaǵdaıǵa meılinshe beıimdeýge kómektesetin naqty usynystar aıtyldy.
