Departament basshysy oblys turǵyndary arasynda kúıdirgi, sal, tyrysqaq, ish súzegi, qylaý, oba sekildi aýrýlar tirkelmegendigin aıtady. Qýanyshqa oraı, juqpaly indet kórsetkishi tómendegen. Máselen, ótken jyldyń osy merzimimen salystyrǵanda juqpaly aýrýlardyń ishinde lıamblıoz – 3,7 esege, juqpaly ishek aýrýlar toby – 43 prosentke, tamaqtan ýlaný jaǵdaılary – 21,4, alǵash anyqtalǵan sozylmaly vırýsty gepatıtter – 6, ókpe týberkýlezi, dızenterııa, jiti vırýsty gepatıt S túri 5 prosentke azaıǵan eken.
– Jalpy, óńirde osy jyldyń alty aıynda birqatar juqpaly aýrýlar aýrýshańdyǵy boıynsha turaqty epıdemıologııalyq ahýal qalyptasýda. Jyl basynan beri menıngokokk ınfeksııasy boıynsha 1 ǵana jaǵdaı tirkeldi. Bul jaǵdaıǵa baılanysty qoǵamdyq densaýlyq saqtaý jáne oblystyq densaýlyq saqtaý sala mamandary tarapynan keshendi sanıtarııalyq-profılaktıkalyq, sondaı-aq, sanıtarlyq-epıdemııaǵa qarsy is-sharalar uıymdastyrylyp júrgizildi. Búgingi tańda oblys turǵyndary arasynda atalǵan ınfeksııa juqtyrǵan jańa derekter tirkelmedi. Qazirgi sátte árbir aýdan aýmaǵynda syrqattanýshylyq kórsetkishterine, epıdemııalyq mańyzdy nysandardyń sanıtarııalyq jaǵdaıyna kúndelikti monıtorıng júrgizilip, barlyq jaǵdaı baqylaýǵa alynyp otyr, – dedi Ulbolsyn О́mirbaıqyzy.
Árıne juqpaly indetter azaıdy dep arqany keńge salýǵa bolmaıdy. Búginde áýe aınalyp júrge túskendeı ystyq. Mundaıda kenelerdiń belsendiligi kúsheıetindigi belgili. Kongo-Qyrym qandy bezgegi sııaqty qaýipti dertten saqtanbasa bolmaıdy. Mamandar tabıǵı oshaqtardy zertteý kezinde 3852 keneniń106-ynan KQTQ-nyń vırýsyn anyqtaǵan eken. Bul, árıne, jaqsy derek emes. Epıdemıologtar sanıtarlyq jumystardy kúsheıtip jatyr.
Baqtııar TAIJAN,
«Egemen Qazaqstan»
Qyzylorda oblysy
