Komandalyq júıe boıynsha ótetin dúbirli dodada Aýǵanstan, Bangladesh, Vetnam, Irak, Qazaqstan, Qytaı, Mońǵolııa, Oman, О́zbekstan, Sırııa jáne Úndistan quramalary óner kórsetedi. Uıymdastyrýshy memleket retinde Parsy eli baıraqty básekege óziniń úsh komandasyn qosýdy qup kórip otyr.
Sary qurlyqta shahmat óneri keremet qarqynmen damyp kele jatqany barshaǵa málim. Máselen, qazirgi kezde Qytaıdyń qos myqtysy áıelder arasyndaǵy álemdik reıtıngte kósh bastap tur. Olar – Ifan Hoý men Szıýı Venszıýn. Qytaıdyń taǵy jeti ókili «TOP-50» oıynshynyń qatarynda. Sondaı-aq, úzdikter tiziminde Dınara Sádýaqasova men Jansaıa Ábdimálik syndy Qazaqstannyń qos sulýy jáne Úndistan, Katar jáne Mońǵolııanyń bir-bir sportshysy bar. Barlyǵy – 14 adam.
Erler arasynda «TOP-50» shahmatshynyń qataryna Azııanyń 10 óreni enip otyr. Olardyń altaýy – Qytaıdan, úsheýi – Úndistannan jáne bireýi – Vetnamnan. Solardyń arasyndaǵy eń úzdik nátıje Dın Lıjenge tıesili. Qytaı shahmatshysy álemdik reıtıngte tórtinshi orynda tur.
Osydan eki jyl buryn Birikken Arab Ámirlikteriniń astanasy – Ábý-Dabıde ótken Azııa ulttary kýbogy jolyndaǵy jarysta Qazaqstannyń qos komandasy da kóńil kónshiterlikteı nátıjege qol jetkizip, úshinshi tuǵyrǵa taban tiregen bolatyn. Jigitterimiz tek Úndistan men Qytaı quramalarynan qalyp qoısa, qyzdarymyz Qytaı men О́zbekstanǵa ǵana jol berdi.
Bıylǵy jarysta erler arasynda Rınat Jumabaev, Murtas Qajyǵalıev, Denıs Mahnev, Petr Kostenko jáne Ánýar Ismaǵambetov sheberlik baıqassa, áıelder saıysynda Dınara Sádýaqasova, Jansaıa Ábdimálik, Gúlmıra Dáýletova, Gúlıshan Naqbaeva jáne Ásel Serikova óner kórsetedi. Básekeler klassıkalyq shahmat, rapıd jáne blısten ótedi.
Ǵalym SÚLEIMEN,
«Egemen Qazaqstan»
