Sheberlik sabaqtary barysynda tabysty kásipkerge basshylyqqa alýǵa qajetti quraldar, startaptyń tabysty damýy úshin Indýstrııa 4.0 tehnologııasyn qalaı qoldaný kerektigi, ol úshin marketıngtiń qandaı strategııalary jáne satylymdary tıimdi ekeni, 500 Startups akseleratoryna qalaı kirýge bolatyny jáne Sılıkon alqabynda ınvestısııalardy qalaı tartýǵa bolatyny týraly aıtyp berdi. Spıkerlerdiń biri – álemniń 60 elinde 500-den astam kompanııany ınvestısııalaǵan 500 Startups aksleratorynyń seriktesi Marvın Lıao. Onyń aıtýynsha, tabysty startap-jobasynyń damýyndaǵy negizgi sát – tutynýshymen keri baılanys. «Siz áleýetti klıentińizben únemi sóılesip, onymen keri baılanys izdeńiz. Nátıjesinde siz bıznesińizdiń qandaı kezeńde ekenin, kemshilikterińizdi ýaqytynda joıý úshin jobadaǵy kedergilerdi bile alasyz», – dep atap ótti spıker. Yahoo-dyń burynǵy kommersııalyq dırektory bıznesmen óz salasyndaǵy betalystar men trendterdi únemi baqylap otyrý qajettiligin atap ótti. Mundaı tásil klıentter úshin durys ónim tańdaýǵa, ony ýaqytynda jaqsartýǵa kómektesedi jáne sizdiń jobańyzdyń qyzmetin qalaı durys paıdalaný kerektigi týraly naqty túsinik beredi.
«Health IT-da» eń yqpaldy áıelder reıtıngisiniń ondyǵyna kiretin Tatıana Kanzavellıdiń pikiri boıynsha, startap jobasyn jasaý kezinde avtor seriktesterdiń ne úshin qajet ekenin anyq bilý kerek. «Men óz klıentterime seriktes izdegen kezde, sizde keminde úsh slaıd bolýy kerek deımin. Birinshide, seriktespen yntymaqtastyqtyń sizge ákeletin paıdasy týraly aqparat. Ekinshide – seriktesterińizge qandaı paıda ákeletinińiz, olarǵa ne úshin qajet ekendigin kórsetiledi. Úshinshi slaıd – sizdiń seriktesińizben yntymaqtastyǵyńyz ortaq klıentterge ne beretini týraly aqpar. Eger sizdiń kompanııańyzda osy úsh suraqqa jaýap bolsa, onda yntymaqtastyq týraly másele týyndamaıdy. О́ıtkeni tabysty bıznes dál osylaı jumys isteıdi», dep esepteıdi 500 Startups akseleratorynyń tálimgeri, Kremnıı alqabynyń ınvestory, «Open Health Network» IT-startabynyń negizin qalaýshy. Sondaı-aq sheberlik synyptarynda startap-ıdeıalarmen tájirıbe júrgizý mańyzdylyǵy týraly aıtyldy.
Venera Túgelbaı,
«Egemen Qazaqstan»
