Toraıǵyr aýyly Baıanaýylǵa barar jol boıynda. Tabıǵaty kóz súrindirer taý ishinde, kól jaǵasynda ornalasqan. Kól sýy bıik quzdy shyńdardyń túbinen tolqyndana jarysa shyǵyp, jaǵaǵa soǵylady. Tústik jıeginde úshkir basty bıik shyń – Naızatas tur. Ashyq beti kólge qaraǵan sý ústine asyla bitken Úńgirtas úńireıedi. Taý túbinen Áýlıebulaqtyń sýy aǵyp jatyr.
Osy bir sulý jerde aqyn Sultanmahmut Toraıǵyrovtyń mereıtoıyna arnalǵan rýhanı-mádenı merekeniń ótýi de ǵajap. Ǵajaıyp tabıǵat aıasynda, bıik quzdy taý baýraıynda ósken órshil aqyn Sultanmahmut HH ǵasyrdyń basyndaǵy qazaq qoǵamynyń shyndyǵyn, jańashyl oı-pikirin jigerli óleńderi arqyly aıta bildi.
Aqyn ulyn eske alǵan Aqbettaýdyń baýraıyndaǵy aýylda jaǵalaı kıiz úıler tigilip, aqshańqan etnoaýyldar tizildi. Qolóner buıymdarynyń túr-túrin kóresiz, oıý-órnek salynǵan san alýan kıim, quraq kórpeler, at ábzelderi deısiz be, barlyǵy da osy bir kúnniń mán-mańyzyna saı jınalǵan dúnıeler kópshilik nazaryna usynyldy.
Toıǵa kelgen qaýym Toraıǵyr aýylynyń janyndaǵy etnoaýyldy án men kúıge bóledi. Ár aýdannyń úıleri tigildi. Buhar jyraý, Máshhúr Júsip, Musa Shormanovtyń atymen atalǵan aýyldar jáne «Qazaq aýyly», tipti «Rýhanı jańǵyrý» dep atalatyn kıiz úıler de qonaqtaryn qushaq jaıa qarsy aldy.
Al «Abaı», «Áýez ǵumyr», «Imanjúsip», «Kóktaý», «Tań aldynda», «Úshqońyr. Prezıdenttiń balalyq shaǵy», «Tuńǵıyq» syndy týyndylardyń avtory, jergilikti sýretshi Jasybaı Qabyldınov Toraıǵyr aýylynyń ásem tabıǵatyn qas-qaǵym sátte qaǵaz betine túsirip, jurtshylyqty tańǵaldyrdy.
Mereıtoıǵa oblys ákimi Bolat Baqaýov bastaǵan qonaqtar, aqyn-jazýshylar qatysty. Barlyǵy da Toraıǵyr aýyly mańyndaǵy aqyn kesenesine baryp quran baǵyshtady. Sultanmahmut mýzeıin aralap kórdi. Qazir mýzeıdiń aldaǵy ýaqyttaǵy qyzmeti, kútimine oraı tıisti jumystar da atqarylýda. Aqynnyń 100 jyldyq mereıtoıyna oraı 1993 jyly kesenesin Mańǵystaýdyń aq tasynan salýǵa zamanymyzdyń zańǵar jazýshysy Ábish Kekilbaevtyń úles qosqany belgili.
Kelesi kezekte tabıǵat aıasynda qurylǵan sahna tórinde respýblıkalyq onlaın-músháıranyń jeńimpazdary marapattaldy. Qazylar alqasynyń tóraǵasy, aqyn, Qazaqstan Jazýshylar odaǵy basqarma tóraǵasynyń birinshi orynbasary Aqberen Elgezek Shyǵys Qazaqstan oblysynan kelgen Raýan Qabıdoldınge bas júldeni tabys etti. Onlaın-daýys bergen oqyrman men qazylar alqasy onyń «Aqynnyń Altaıǵa kelýi» atty týyndysyn joǵary baǵalady.
Shymkenttik aqyn Batyrhan Sársenhan birinshi, ekinshi oryndy Qarlyǵash Qabaı men Umtyl Zaryqqanuly ıelendi. Úshinshi júldeni almatylyq Aıdana Qaısarbekqyzy, kókshetaýlyq Qaırat Seıtqazın, pavlodarlyq Jarqynbek Amantaıuly aldy.
Sonymen birge Sultanmahmut Toraıǵyrov atyndaǵy arnaıy júldege jerlesimiz Jolaman Áıtken ıe boldy.
Mereıtoıǵa arnalǵan mádenı, sporttyq is-sharalar dástúrli ánshilerdiń birinshi respýblıkalyq án baıqaýymen jalǵasty. Elimizdiń óńirlerinen kelgen jas aqyndar óleńderin arnady.
Farıda BYQAI,
«Egemen Qazaqstan»
Pavlodar oblysy,
Baıanaýyl aýdany
