Tájikistannan Qazaqstanǵa oqý-jattyǵý týrymen Tájikstan Respýblıkasy parlamenti, energetıka jáne sý resýrstary mınıstrligi, ádilet mınıstrligi, zańnama jónindegi ulttyq ortalyq, EQYU-nyń Dýshanbe qalasyndaǵy baǵdarlamalar keńsesi ýákilderinen turatyn delegasııa keldi. Sapardyń maqsaty – energııa únemdeý máselelerin talqylaý jáne «jasyl» tehnologııalar boıynsha qazaqstandyq tájirıbemen tanysý.
Oqý-jattyǵý týry aıasynda tájik delegasııasy «TKSh Qazortalyǵy» AQ-tyń energııa únemdeıtin ǵımarat prınsıpi boıynsha jasalǵan jáne energııa únemdeıtin tehnologııalar men materıaldardy qoldaný arqyly salynǵan ortalyǵyna bardy.
«Turǵyn úı-kommýnaldyq sharýashylyǵyn damytýdyń qazaqstandyq ǵylymı-tehnıkalyq ortalyǵy» JShS bas dırektorynyń birinshi orynbasary Dosan Qurmanov ortalyqty jylytý úshin energııany tutyný standartty ǵımaratpen salystyrǵanda 30%-ke aspaıtynyn atap ótti.
«Ǵımaratty jylýmen jabdyqtaýdyń avtonomdy kózi retinde elektr qazandyqtary men jylý sorǵylary ornatylǵan. Budan basqa, jylytý ǵana emes, sonymen qatar jazda ǵımaratty salqyndatý úshin de qoldanylatyn batareıalarmen jabdyqtalǵan. Elektrmen jabdyqtaý qalalyq elektr jelileri, avarııalyq dızel generatory sondaı-aq kún batareıalary arqyly qamtamasyz etiledi. Sýmen jabdyqtaý kózi – qalalyq sý jelisi. Keleshekte aýmaqtaǵy kógaldy sýarý úshin qaıtadan paıdalanylatyn aǵyndy sýlardy tazartý qondyrǵysyn qosý josparlanyp otyr», dep atap ótti D.Qurmanov.
Tájikstan oqý-jattyǵý týrynyń negizgi maqsaty «jasyl» bastamalardy nasıhattaýǵa kómektesý bolyp tabylatyn «Qazaqstan ekologııalyq uıymdary qaýymdastyǵy» jáne «Jasyl» ekonomıka jáne G-Global damytý koalısııasy» ZTB uıymdastyrdy.
