Orynbor oblysy Pervomaı aýdanynyń Ýdarnoe aýylynda dúnıege kelgen Damır Ismaǵulov kópten beri myqty jekpe-jekterimen kózge túsip júr. Osy sport túrine kesheýildep, ıaǵnı 22 jasynda kelgenine qaramastan óziniń eńbekqorlyǵy men tabandylyǵy, jankeshtiligi men qaısarlyǵynyń arqasynda biraz belesterdi baǵyndyrdy. Bas-aıaǵy tórt jyl ýaqyt aralyǵynda Damır 18 jekpe-jek ótkizip, 16 ret jeńiske jetti. Byltyrǵy jyldyń mamyr aıynda Orynborda ótken jarysta Sankt-Peterbýrgten kelgen Maksım Dıvnıchti besinshi raýndta tehnıkalyq nokaýtpen utyp, 70 kılo salmaq dárejesi boıynsha «M-1» uıymynyń chempıondyq belbeýin ıelendi. Sodan bergi ýaqytta qandasymyz taǵy úsh jekpe-jek ótkizip úlgerdi. Sol básekelerde brazılııalyq Rojerıo Karranka, grýzııalyq Raýl Tataraýlı jáne belarýssııalyq Artem Damkovskııden basym túsip, ózine tıisili álem chempıony ataǵyn saqtap qaldy.
Eger joǵarydaǵy jospar júzege asyrylyp, Damır Ismaǵulov AQSh-qa attanatyn bolsa, onda ol UFC-men kelisimshartqa otyrǵan ekinshi qazaq sportshysy retinde tarıhta qalady. Esterińizde bolar, 2014 jyly álemdegi eń bedeldi uıymda Qytaıda týyp-ósken qandasymyz Jumabek Tursyn óner kórsetken bolatyn. О́kinshike qaraı, muhıttyń arǵy betinde Jumabektiń joly bolmady. Endigi úmit – Damırda. Orynborda týyp-ósken qazaqtyń 27 jastaǵy qaısar uly UFC-de óziniń myqtylyǵyn moıyndatady degen úmittemiz.
Ǵalym SÚLEIMEN,
«Egemen Qazaqstan»
