Arnaıy qurylǵan komıssııa 152 úıdiń 13-in turýǵa jaramsyz dep tanyǵan bolatyn. Qazirgi ýaqytta aýdanda turýǵa jaramdy 134 úıge jóndeý jumystary júrgizilip jatyr. Al baspanasy jaramsyz dep tanylǵan úı ıelerine oblys basshylyǵy jańadan úı satyp alyp beremiz dep ýáde bergen edi. Jaqynda «Nur Otan» partııasy oblystyq fılıaly tóraǵasynyń birinshi orynbasary Ánýarbek Muhtarhanov Shemonaıha aýdanyna arnaıy baryp, 12 otbasyna baspana kiltin tapsyrdy.
«25 naýryz kúngi jaǵdaı áli esimde. Meniń úıim sýǵa batyp ketti. Irgetasy úsh jerden jaryldy. Sol kezdegi jaǵdaıymdy kórseńizder ǵoı. Buryn tek teledıdardan kóretin jaǵdaıdyń basyma keletinin oılamaǵan da edim. Qıyn sátte bizben birge bolǵan halyqqa, ásirese Elbasyna, oblys basshylyǵyna rahmet aıtamyz. Apat bolǵan alǵashqy kúnnen ár turǵynnyń jaǵdaıyn jeke-jeke bilip, úıdi-úıdi aralap, gýmanıtarlyq kómek jetkizgen «Nur Otan» partııasyna alǵysymyz sheksiz», dedi burynǵy turǵan úıinen áldeqaıda jaqsy, qolaıly, 4 bólmeli baspanaǵa qol jetkizgen Lıýdmıla Degtıareva.
Partııa fılıalynyń baspasóz qyzmetiniń habarlaýynsha, bul kúni Shemonaıha turǵyndaryna tek páter kiltin ǵana emes, Astanadan arnaıy kelgen «Memlekettik qyzmet kórsetý salasyndaǵy qyzmetkerlerdiń jergilikti kásiptik odaǵy» qoǵamdyq birlestiginiń tóraǵasy birneshe turmystyq tehnıkalardy tartý etti. Olar ózderimen birge 18 tońazytqysh, 7 kir jýatyn mashına, 8 teledıdar alyp keldi. «Aýdanda jóndeý jumystary qyzý júrip jatyr. Tamyzdyń aıaǵyna deıin 126 úıdegi jóndeý tolyq aıaqtalady. Jumys barysy tolyq baqylaýda. Aýdandyq ákimdiktiń aldyna qoıylǵan mindet bar. Sondyqtan tasqynnan zardap shekken halyqty qalypty tirshiligine oraltý kún tártibindegi basty másele», deıdi «Nur Otan» partııasynyń oblystyq fılıaly tóraǵasynyń birinshi orynbasary Ánýarbek Muhtarhanov.
Azamat QASYM,
«Egemen Qazaqstan»
Shyǵys Qazaqstan oblysy,
Shemonaıha aýdany
