Jıyndy Syrtqy ister mınıstrligi men «KAZENERGY» Qazaqstan munaı-gaz jáne energetıka kesheni uıymdarynyń qaýymdastyǵy» uıymdastyrdy. Is-sharaǵa sala mamandary, halyqaralyq bıznes qaýymdastyq ókilderi men dıplomatııalyq korpýs qatysty.
Brıfıngte baıandama jasaǵan «KAZENERGY» bas dırektory Áset Maǵaýov elde atqarylyp jatqan sharalarǵa toqtaldy. Onyń aıtýynsha, qazirgi tańda munaı jáne energetıka salasynda mańyzdy jumystar atqarylýda.
«KAZENERGY» zańnamalyq jumystarǵa belsendi qatysady. Bizdiń maqsat – munaı jáne energetıka salasyndaǵy ınvestısııa klımatyn jaqsartý. Energetıka mınıstrligimen birlese jer qoınaýy týraly kodeksti reformalaýǵa atsalystyq. Byltyr osy zań jobasy qabyldandy», dedi Á.Maǵaýov.
Bıyl elimizdegi úsh munaı óńdeý zaýyty tolyǵymen iske qosylǵannan keıin munaı ónimderiniń kólemi artpaq. Sondaı-aq benzın jáne dızeldi otynnyń eksporty boıynsha kedendik baj salyǵyna ózgertýler engiziledi. Spıkerdiń aıtýyna qaraǵanda, aýyl sharýashylyǵyna arnalǵan janarmaı jetkizý men kommýnaldyq kásiporyndarǵa arnalǵan jylytatyn mazýt jeńildikteri alynyp tastalǵan.
«Byltyr eksport dollar ekvıvalentinde 25%-ti qurasa, bizdiń zaýyttarǵa jetkiziletin munaı baǵasy 47%-ke ósken. Bıyl úsh zaýytty jańǵyrtý aıaqtaldy. Qazir benzın men dızel otynyna qatysty eksporttyń kedendik bajyn reformalaý boıynsha jumystarǵa qatysýdamyz. Kelesi jyldyń 1 qańtarynan bastap benzın men dızeldi otyndy eksportqa shyǵarmaımyz. Biraq eldegi munaı óńdeý kólemi aıtarlyqtaı kóbeıedi. Sondyqtan jaqyn jáne alys shet elderge munaı ónimderin tasymaldaý joldary ashylsa quba-qup», dedi Á.Maǵaýov.
Sonymen qatar munaı ónimderiniń aksızderi salasyndaǵy birqatar máselege toqtaldy. Baıandamashynyń sózine súıensek, otandyq óndirýshiler osy baǵytta kóp qarajat jumsaıdy eken. Salystyrmaly túrde qarasaq, Reseıde aksızderdiń quny elimizdegi baǵadan eki ese tómen.
«Aksızdiń mólsheri birdeı bolǵany jón. Máselen reseılikter óz benzınin ımporttaǵanda 4 500 teńge tólese, otandyq zaýyttar 10 500 teńge jumsaıdy. Sol sekildi dızeldi otyndy ımporttyq jetkizý tonnasyna 540 teńgeni quraıdy. Al qazaqstandyq ónimge 9 300 teńge tóleýge týra kelip otyr», dedi Á.Maǵaýov.
Budan bólek, jıyn barysynda munaı jáne energetıka salasyndaǵy josparlar da aıtyldy. Máselen munaı jáne gaz óndirý boıynsha Qazaqstandaǵy eń úlken úsh meken – Teńiz, Qarashyǵanaq jáne Qashaǵan el ekonomıkasyn damytýǵa eleýli úles qosady. Al 2025 jyly munaı óndirý kólemi 104 mıllıon tonnaǵa deıin jetpek.
Abaı ASANKELDIULY,
«Egemen Qazaqstan»
