Keshe Lısakov qalasynda Krasnooktıabr boksıt basqarmasynyń ashanasynan tústik tamaq ishken 39 jumysshy ýlanyp qaldy. Aldymen 38 adam medısınalyq kómekke júgingen, sodan soń 24 adam Lısakov qalalyq aýrýhanasyna jatqyzylyp, 14 adam oblystyq aýrýhanaǵa jóneltilgen bolatyn. Erteńine oblystyq aýrýhanaǵa taǵy 10 adam jetkizildi. Osy másele boıynsha oblystyq qoǵamdyq densaýlyq qorǵaý departamenti mamandary ótkizgen baspasóz máslıhatynda tamaqqa ýlanǵan jumysshylardyń hali jaqsaryp kele jatqandyǵy aıtyldy.
– Jumysshylar orta jáne jeńil dárejede ýlanǵan. О́mirlerine esh qaýip joq. Olardyń arasynan 15 adamdy aýrýhanaǵa jatqyzbaýǵa da bolar edi. Biraq profılaktıkalyq shara jáne ýlaný sebebin aıaǵyna deıin zertteý úshin barlyǵy da emdeý ornynda bolýy kerek dep sheshtik. Qazir barlyǵy em alyp jatyr. Jumysshylar ashanada daıyndalǵan tústik tamaqtan keıin ózderin nashar sezingen. Lısakov qalalyq jáne oblystyq aýrýhanalarynda jatqan jumysshylardyń jaǵdaıy jaqsaryp keledi, – dedi oblystyq densaýlyq saqtaý basqarmasy bastyǵynyń orynbasary Ekaterına Slobodenıýk.
Dárigerler ýlanǵan jumysshylarǵa «asqynǵan asqazan qabynýy» degen dıagnoz qoıdy. Onyń juqpaly ekeni de aıtyldy.
– Iá, bul juqpaly aýrý. «Asqynǵan asqazan qabynýy» – aýrýdyń jalpy ataýy, bul ári qaraı túr-túrge bólinedi. Ol salmonellez be, asqynǵan juqpaly ish aýrýy ma, álde vırýstyq juqpaly aýrý ma, ázirge eshnárse aıta almaımyz. Naýqastardan taldaýǵa materıaldar alyndy. Laboratorııada zerttelgen soń, barlyǵy anyqtalady, – dedi oblystyq qoǵamdyq densaýlyq qorǵaý departamenti juqpaly jáne parazıtarlyq aýrýlardy epıdemıologııalyq qadaǵalaý bóliminiń basshysy Gúlim Dosymova. Dárigerler jumysshylardyń ýlanýy sapasyz azyq-túlikten be, tamaqtyń sapasyz daıyndalýynan ba, álde aýyrǵan adamnan tarady ma, ony tap basyp aıtýǵa áli erte ekenin aıtty. Ashanada tazalaý, dezınfeksııa jumystary júrgizildi. Alynǵan materıaldar tekserisinen keıin barlyǵy anyqtalady. Al naýqastar aýrý jaǵdaıyna qaraı 7 kúnnen 10 kúnge deıin emdeledi.
Názıra JÁRIMBET,
«Egemen Qazaqstan»
