Indetip izdegenge bári aıqyn. 97 myń 538 adam tolyqqandy jumyspen qamtylmaǵan, bylaı aıtqanda jumyssyz deseńiz bolady. «E, osynshama jumyssyz adam bar eken. Eki qolyna kúrek taba almasa óz obaly ózine» deýge bolar ma edi? Keıbir ákimder «amalym joq» der me edi? Qyzylorda oblysynyń ákimi olaı oılamaıdy eken.
Shaǵyn jáne orta bıznesti óristetýge 32 mlrd teńgeniń esebin shyǵardy. Qaltany urmaıtyn, aı, jyl saıynǵy ınflıasııamen-aq aıyrmasyn jep qoıatyn jeńil nesıe, úzdik jobalarǵa qaıtarymsyz grant.
Ár aýdan, aýyl ákimderine naqty tapsyrmalar berilgen. Aýyl ákimderiniń jumysyna septesý úshin qasyna basqarma, jetekshi mekemelerden arnaýly ókil bóldi. Sodan soń aýdan, qala aralaǵan oblys basshysy jumys saparynyń sońynda kásipkerlikti qoldaýǵa baılanysty qorytyndy jıyn ótkizdi.
Alda berekesi aqtarylǵan qońyr kúz kele jatyr. Kásipkerlikti damytý máselesiniń qorytyndy sheshimi shyǵady. Osyǵan baılanysty oblystyq kásipkerler palatasynyń dırektory Ǵalymbek Jaqsylyqov jaqsy jańalyǵymen bólisti.
Oblys ákimi Qyrymbek Kósherbaev oblystyń ár aýdany jáne Qyzylorda qalasy boıynsha úzdik kásipkerlerdi, oblys boıynsha bir úzdik aýyl ákimin jáne bir jaýapty bekitilgen tulǵany, sondaı-aq palatanyń aýdandaǵy bir fılıalyn 1 mln teńgeden qarjylaı syıaqymen marapattaý týraly sheshim qabyldapty. Oǵan kimderdiń laıyqty bolatyndyǵy jyl sońynda anyqtalady.
Baqtııar TAIJAN,
«Egemen Qazaqstan»
Qyzylorda oblysy
