Qaladaǵy alǵashqy da iri saýda orny «Qyrǵy bazardyń» mańy zańsyz saýda dúńgirshikterine toly bolatyn. Kólik qozǵalysyna jáne kóshe tazalyǵyna keri áserin tıgizip kelgen bul másele kópten beri kóterilip kelgen de edi. Qala basshylyǵyn tizginge alǵan talaı ákim de, tártip saqshylary da retsiz saýdany joıa almaǵan-dy. Kóp jyldardan beri Shymkenttiń «bas aýryna» aınalǵan retsiz saýda oryndary 30 shilde kúni súrile bastady.
О́ıtkeni «Qyrǵy bazar» aýmaǵynda jol boıyndaǵy keleńsizdikti joıýǵa negizdelgen sot sheshimi kúshine endi. Al osyǵan deıin Ál Farabı aýdandyq ákimdiginde sot sheshiminiń oryndalýy talqylanǵan jıyn ótken bolatyn. Jıynda aýdan ákimi Ǵabıt Máýlenqulov bazar basshylarymen memorandým túzilgenin málimdedi. Sot sheshimi boıynsha 35 dúńgirshek alynyp tastalady.
Sóıtip 5 gektar jer telimi memleketke qaıtarylady. Kásipkerlerge múlikterin kóshirip áketýi úshin birshama ýaqyt berilgen. Qalalyq TKSh basqarmasy basshysynyń mindetin atqarýshy Nurlan Bektursynovtyń aıtýynsha, ákimdik retsiz saýda ıeleri úshin 150 áleýmettik oryn berý týraly «Qyrǵy bazar» JShS-nyń basshylyǵymen kelisimge kelgen. Kelisimge sáıkes, atalmysh kásipkerler alǵashqy úsh aı merziminde bazar ishindegi saýda oryndaryn jalǵa alýdan jáne salyq tóleýden bosatylady.
Dúısenbi kúni tańerteń Tóle bı kóshesine polısııa qyzmetkerleri, ákimdik ókilderi men saýdagerler jınaldy. Sot sheshimin oryndaýshylar arnaıy tehnıkalarmen iske kirisip, zańsyz saýda oryndary súrildi. Dúńgirshekterdiń súrilýine qarsylyq bildirgen satýshylar da az bolmady. Olar ákimdik ózderine eki aı ýaqyt berse, bazardan óz erkimen ketýge daıyn ekenin jetkizdi. Al quqyq qorǵaý oryndary ókilderiniń málimdeýinshe, saýdagerlerge bazardyń ishinen oryn taýyp berý usynylǵanymen, saýda bolmaıtynyn aıtyp kóshýden bas tartqan.
Erkin DOSYMBAI,
Shymkent qalasy
