Osy ýaqytqa deıin Qyzyljar temir jol vokzalynda jolaýshylar poıyzdarynyń Máskeý ýaqyty boıynsha qatynaýynyń saldarynan túrli qolaısyzdyq týyndaıtyn. Bul máseleni «Egemen Qazaqstan» gazeti biraz ýaqyt buryn kótergen bolatyn («EQ», «Qyzyljar vokzaly qashan qazaqstandyq bolady?», №20, 30 qańtar, 2018 jyl). Iаǵnı qala vokzalynan Astanany betke alǵanda 50-60 shaqyrymdaı qashyqtyqta ornalasqan Smırnov temir jol beketine deıingi aralyq «Reseı temir joldary» AAQ-tyń Ońtústik-Oral temirjolyna qaraıtynyn, sonyń saldarynan vokzal ǵımaratynyń mańdaıyndaǵy saǵat ta, poıyzdardyń júrý kestesi de, jolaýshy bıletindegi ýaqyt ta kórshi eldiń ýaqytymen esepteletinin qaýzaǵan edik. Osy maqaladan keıin Parlament Májilisiniń depýtattary da atalǵan másele boıynsha Premer-Mınıstrdiń atyna saýal joldaǵany málim. Endi mine, «Egemen» kótergen másele el paıdasyna sheshildi. Bıyl 1 tamyzdan bastap poıyzdar jergilikti ýaqyt boıynsha júre bastady.
Petropavl temir jol beketi bılet kassalarynyń meńgerýshisi Olga Japkonyń aıtýynsha Petropavl vokzalyndaǵy poıyzdardyń kelýi jəne jóneltilýi jónindegi kestede, bıletterde, elektrondy tabloda jəne ǵımaratqa kire beriste mańdaıshada ilýli turǵan saǵatta jergilikti ýaqyt kórsetiledi. Poıyzdardyń júrý ýaqyty dybys kúsheıtkish arqyly habarlanady. Bul jańashyldyq jolaýshylarǵa sapaly qyzmet kórsetý talabynan týyndap otyr. Búginde aqparattyq júıeni ózgertý baǵytynda keshendi sharalar atqarylýda.
«О́zge qalalarda turatyn týǵan-týysqandarymyzben baılanystyratyn jalǵyz vokzaldyń jergilikti ýaqytqa kóshýin burynnan tilep júretinbiz. Məskeý ýaqytyna úırenise almaı, talaı shatasqan kezimiz boldy. Keı kezderi kassa qyzmetkerler poıyzdyń Məskeý ýaqytymen júretinin eskertýdi umytyp ketip jatatyn. Keshigip, joldan qalyp qoıǵan kezder joq emes», deıdi qýanyshtaryn jasyra almaǵan petropavldyqtar.
Petropavl vokzaly “Reseı temir joldary” AAQ-nyń Ońtústik Oral fılıalyna qaraıdy. Byltyr Ońtústik Oral temir joly arqyly 791 myń tonna júk, 700 myńǵa jýyq jolaýshy tasymaldanypty.
2018-2019 jyldarǵa arnalǵan baǵdarlamaǵa oraı vokzal aýmaǵynda jańǵyrtý sharalary júrgizilýde. Joba boıynsha ǵımarattardyń ishi men syrty zaman talabyna səıkestendirilip, eskalator ornatylady.
О́mir ESQALI,
«Egemen Qazaqstan»
Soltústik Qazaqstan oblysy
