«Sibir Mıssııasy» – Lıtva Respýblıkasy bıliginiń tarapynan qoldaý taýyp, 2006 jyldan beri iske asyrylyp kele jatqan joba. Joba sheńberinde jastardan quralǵan ekspedısııa jer aýdarylǵan lıtvalyqtardyń zırattaryna barady. Sondaı-aq jergilikti lıtvalyqtar nemese olardyń urpaqtarymen kezdesedi. Mıssııa músheleri jyl saıyn álem boıynsha deportasııalanǵan lıtvalyqtardyń qabirlerin aralap, málimetter jınaqtaıdy.
Lıtva halqynyń tarıhyn saqtaý, Lıtva men Qazaqstannyń ortaq tarıhyn túsiný, alǵan áserlerin Lıtva jurtshylyǵymen bólisý, sondaı-aq Lıtva men Qazaqstan arasyndaǵy mádenı baılanysty nyǵaıtý maqsatyndaǵy ekspedısııa elimizge 19 shildede kelgen bolatyn. Ekspedısııaǵa qatysýshylar lıtvalyqtardyń Qaraǵandy oblysyndaǵy zırattaryna baryp, óńirde turatyn qandastarymen kezdesti. Jer aýdarylǵan lıtvalyqtardyń qabirlerin jóndeýmen aınalysty. Ekspedısııa músheleri 10 kúnniń ishinde Qaraǵandy, Jezqazǵan jáne Balqash óńirlerin aralap úlgergen. Endi, mine, Astanadaǵy ulttyq kitaphanada sapar qorytyndysyn jarııalady.
Aıtýlarynsha, kezinde elimizge jer aýdarylǵan lıtvalyqtar týraly aqparattardy túgendep, olardyń urpaqtarymen kezdesken. Al qıyn-qystaý kezeńde Qazaqstanǵa Lıtvadan 50 myńnan asa adam kelgen. Iá, 1941 jyldyń maýsymyndaǵy kóterilisten keıin Qazaqstanǵa májbúrlep qonys aýdarǵan lıtvalyqtar kóp. Sapar barysynda solardyń 200-ine qatysty aqparat naqtylanyp, tyń derekter tabylǵan.
Dınara BITIK,
«Egemen Qazaqstan»
