Q.Ábdirahmanovtyń aıtýynsha, Palestına mınıstriniń sapary eki el arasynda halyqaralyq jáne aımaqtyq ózekti máseleler boıynsha pikir almasýǵa, ekijaqty yntymaqtastyqtyń qazirgi jaǵdaıy men bolashaǵyn aıqyndaýǵa múmkindik berip otyr.
Oǵan qosa 26 jyldyq tarıhy bar qarym-qatynastar aıasynda Qazaqstan men Palestına saıası, saýda-ekonomıkalyq, mádenı-gýmanıtarlyq jáne basqa da salalardaǵy baılanystardy odan ári nyǵaıtýǵa múddelilik bildirýde. Onyń ishinde qos tarap aýyl sharýashylyǵy, medısına, bilim salalary boıynsha qarym-qatynastardy jandandyra túspek.
– Qazaqstan Palestınamen ekijaqty yntymaqtastyqty damytýǵa asa úlken mán beredi. Atalǵan yntymaqtastyqtyń negizin Qazaqstan óz táýelsizdigin jarııalaǵan kezde 1991 jyly Palestınany azat etý uıymynyń, Palestına ulttyq ákimshiliginiń kóshbasshysy, marqum Iа.Arafattyń Qazaqstanǵa, sondaı-aq Elbasymyz N.Nazarbaevtyń 1995 jyly Palestınaǵa ótken saparlary qalady. Bıyl eki el arasynda dıplomatııalyq qarym-qatynastardyń ornaǵanyna jıyrma alty jyl toldy. Osy ýaqyt ishinde elderimiz arasyndaǵy ekijaqty qarym-qatynastarmen birge, BUU, IYU jáne basqa da halyqaralyq uıymdar sheńberinde kópjaqty yntymaqtastyǵymyz damı tústi, – dedi Qazaqstannyń Syrtqy ister mınıstri.
Onyń ústine Palestına memleketi halyqaralyq uıymdar sheńberinde elimizdiń negizgi halyqaralyq bastamalaryna turaqty túrde qoldaý kórsetip keledi.
Qaırat Ábdirahmanov elimiz Palestına problemasynyń rettelýi Taıaý Shyǵys óńirinde uzaq merzimdi beıbitshilik pen turaqtylyqty ornatýdyń negizgi sharty bolyp tabylatynyna senim arta otyryp, Palestınany táýelsiz memleket retinde moıyndap, halyqaralyq qaýymdastyqtyń tolyqqandy múshesi bolýyn dáıekti jaqtaıtyndyǵyn da atap ótti.
– Qazaqstannyń atalǵan máselege oraı ustanymy ózgerissiz qalady. Palestındik-ızraıldik janjaldyń sheshimi 1967 jylǵy shekaralarda astanasy Shyǵys Ierýsalım bolyp tabylatyn Palestına memleketiniń qurylýyn kózdeıtin «eki halyqqa – eki memleket» qaǵıdasy boıynsha iske asýy tıis. Túrli qıyndyqtarǵa qaramastan, kelissózder prosesi ári qaraı jalǵasýy kerek, – dedi óz sózinde Qaırat Ábdirahmanov.
Al Palestına memleketiniń Syrtqy ister jáne ekspatrıanttar mınıstri Rııad ál-Málkı Qazaqstan tarapynyń ystyq yqylaspen qarsy alyp, kelissózder júrgizýge múmkindik bergendigi, qıyn-qystaý jyldary aımaqtyq jáne halyqaralyq qoǵamdastyq aldynda úzdiksiz qoldaý bildirip otyrǵandyǵy úshin alǵysyn jetkizdi.
– Bizdiń baılanystarymyz tek saıası qarym-qatynastarmen shektelmeıdi. Atap aıtqanda, týrızm, aýyl sharýashylyǵy, densaýlyq saqtaý, mádenıet salalaryndaǵy yntymaqty óristetýge múddelimiz. Onyń ústine Astana búginde aımaqtyq, halyqaralyq mańyzdy habqa aınaldy, – dedi Rııad ál-Málkı.
Kezdesý barysynda elimizdiń BUU Qaýipsizdik Keńesiniń turaqty emes múshesi retinde Taıaý Shyǵysta beıbitshilikti ornatýdyń ajyramas sharty bolyp tabylatyn óńirdegi turaqtylyqty qalpyna keltirý prosesine tolyq qoldaý kórsetýdi jalǵastyratyny aıtyldy.
Sondaı-aq Rııad ál-Málkıdiń resmı sapary aıasynda Syrtqy ister mınıstrligi men Palestına memleketiniń Syrtqy ister jáne ekspatrıanttar mınıstrligi arasyndaǵy «Saıası konsýltasııalar jónindegi ózara túsinistik týraly» jáne Palestınanyń Saýda, ónerkásip jáne aýyl sharýashylyǵy palatalarynyń federasııasy jáne «Qazaqstannyń Syrtqy saýda palatasy» JShS arasyndaǵy yntymaqtastyq týraly memorandýmdarǵa qol qoıyldy.
Serik ÁBDIBEK,
«Egemen Qazaqstan»
