Máselen, keı jyldary pııaz óte tıimdi bolady. Pııaz ekkenderdiń meldektep paıdaǵa shyqqanyn kórgen sharýalar keler jyly basqa daqylyn jıyp qoıyp, pııaz egip, nátıjesinde shyǵarǵan shyǵynynyń da ornyn jaba almaı, shaqshadaı basy sharadaı bolyp ókinishten san uryp qalǵan jaǵdaılar bar. Keı jaǵdaıda ketpenin jerge uryp, qaladan kásip izdep jatatyndary da kezdesedi. Osylaısha, qaladaǵy jumyssyzdardyń qataryn toltyrady. Úkimet sharýalardy osyndaı tyǵyryqtan shyǵarýdyń jolyn únemi izdestirip keledi. О́ńirlerde de qal-qadirinshe jaqsy jańalyqtar dúnıege kelip jatyr.
Sonyń biri, Qyzylorda oblysynda aýyl sharýashylyǵy basqarmasynyń bastamasy boıynsha aýylsharýashylyq ónimderin, tuqymdardy, aýyl sharýashylyǵy tehnıkalaryn, tyńaıtqyshtardy, hımııalyq zattardy satyp alýǵa, satýǵa nemese aıyrbastaýǵa jáne qyzmetterdi paıdalanýǵa bolatyn «Agrobırja» ınternet-resýrsy quryldy.
– Azyq-túlik taýarlary baǵasynyń ósýine yqpal etetin faktorlardyń biri – deldaldardyń kóptigi ekeni eshkimge jasyryn emes. Sarapshylardyń pikirinshe, olar 65-85 prosentti quraıdy. Bul burmalanǵan baǵa men baǵany negizsiz kóterýge alyp keledi. Osy maqsatta biz «Agrobırja» aýylsharýashylyq ónimderiniń saýdasyna arnalǵan elektrondy platforma qurdyq. Bul satylym naryǵyn keńeıtýge, satyp alýshy men satýshy arasyndaǵy tikeleı baılanysty ornatýǵa, eksporttyq operasııalardy arttyrýǵa múmkindik beredi, – deıdi Qyzylorda oblysynyń aýyl sharýashylyǵy basqarmasynyń bastyǵy Baqyt Jahanov.
Qyzylorda aýyl sharýashylyǵy basqarmasynyń bastamasy respýblıkada da jaqsy qoldaý taýyp otyr. Aýyl sharýashylyǵy vıse-mınıstri Gúlmıra Isaeva osyndaı agrobırja qurý tájirıbesin basqa óńirlerge taratý jaıyn aıtady.
Agrobırjanyń veb-saıtyndaǵy aqparat qazaq, orys, aǵylshyn jáne qytaı tilderinde usynylady. Búginde Qyzylorda oblysy et ónimderin Iran memleketine eksporttaýdy bastady. Sondyqtan parsy tilinde de aqparat ázirlenbek. Ádette, dıqandar men sharýalardyń óndirgen ónimin bazar jaǵalaǵan deldaldar shóp basyn syndyrmaı kóterme baǵamen satyp alyp ketetin. Ústine óz ústemesin qoıyp, eki jep bıge shyǵyp keldi. Tyńaıtqysh, aýyl sharýashylyǵy tehnıkalaryn satý máselesi de ortada esep aıyratyndardyń kómegi arqyly júzege asyrylatyn.
«Agrobırja» endi sharýalarǵa bar keregin taýyp berip qana qoımaı, eńbeksiz mal tabatyndardyń da jolyn kesedi.
Baqtııar TAIJAN,
«Egemen Qazaqstan»
Qyzylorda oblysy
