«Bizdiń qoǵamnyń ıdealy – ol óziniń tarıhyn, tilin, mádenıetin biletin, bul rette zamanaýı, shetel tilderin meńgergen, aldyńǵy qatarly jáne jahandyq kózqarasy bar qazaqstandyq bolý kerek», dep atap kórsetken bolatyn Elbasy N.Nazarbaev «Tórtinshi ónerkásiptik revolıýsııa jaǵdaıyndaǵy damýdyń jańa múmkindikteri» atty Joldaýynda. Otan aldyndaǵy boryshyn óteýge shaqyrylǵan jastarymyzdyń arasynda bilimdi de bilikti azamattar az emes.
6697 áskerı bólimge kelgen sarbazdardyń uzyn sany eki júzden asady. Olardyń deni Qyzylorda, Taraz, Pavlodar, Atyraý oblystarynan shaqyrylǵandar. Júrek tebirenter rásimge atalǵan óńirlerden sarbazdardyń ata-analary men týys-týǵandary da arnaıy kelipti. Bireýleri balalarynyń, al ekinshileri baýyrlarynyń elin qorǵaıtyn azamat bolǵanyna kóz jetkizip erekshe qýanyshqa bólendi. «Sizderdiń qyzmetterińiz – árbir qazaqstandyq otbasynyń tynyshtyǵy men erteńgi kúnge degen senimdiliginiń kepili. Sizder bul jerden otansúıgishtik, adamgershilik qasıetterdi boılaryńyzǵa sińirip ári tózimdi bolýǵa úırenesizder», dedi Qazaqstan Respýblıkasynyń Ulttyq ulany «Ortalyq» óńirlik qolbasshysynyń tárbıe jónindegi orynbasary, polkovnık Saverdın Imırov shara barysynda.
«Búgin bizdiń bólimde saltanatty jáne aıtýly kún. Jas sarbazdarymyz Qazaqstan halqyna jáne onyń zańdy túrde saılanǵan Prezıdentine adal qyzmet etip, Otanymyzdyń abyroıyn asqaqtata túsetin bolady» dep atap ótti 6697 áskerı bólim komandıri, podpolkovnık Erlan Ipatov.
Oqý-jattyǵýda bolyp kelgen sarbazdarymyz ant qabyldaý saltanatynda daıyndyqtarynyń joǵary deńgeıde ekenin kórsetti. Olar saptyq amaldardy, jaýyngerlik qarýdan atý mashyq-daǵdysyn, sondaı-aq jaýyngerlik tehnıkany júrgizýdi jáne basqa da áskerı is-qı-
myldardy jetik meńgergen.
Otan aldynda ant qabyldaǵan soldattarymyz aldaǵy ýaqytta qoǵamdyq qaýipsizdikti qamtamasyz etip, qylmystyq atqarý júıesi mekemelerin kúzetý sekildi jaýapty mindetterdi oryndaýǵa kirisetin bolady.
Qymbat ShUǴAIYP,
kishi serjant
