«Mýzeı isiniń úzdikteri» atty joba aıasynda elimizde alǵash ret eki tilde jaryq kóretin atalmysh ensıklopedııanyń materıaldaryn jınaqtaý jumystaryn Ulttyq mýzeı ujymy júrgizedi. Brıfıngke qatysqan Ulttyq mýzeıdiń Qorlardy jınaqtaý, esepke alý jáne saqtaý qyzmetiniń jetekshisi, bas qor saqtaýshy Ryskúl Bektalıeva óz sózinde atalmysh jobanyń óte mańyzdy jáne jaqsy bastama ekendigin erekshe aıtyp ótti. Al «Astana Opera» mýzeıiniń meńgerýshisi Aprıza Hýsaınova buryn-sońdy dál osyndaı jobalar júzege aspaǵandyǵyna toqtalyp, árdaıym barlyq marapattar men laıyqty qurmet kórsetilýden mýzeıler men kitaphanalardyń qyzmetkerleri tys qalyp qoıatyndyǵyn da sóz etti. Qorytyndy sózinde bul ensıklopedııa Qazaqstandaǵy barlyq mýzeılerge, jalpy mádenı uıymdarǵa taptyrmas qural bolatyndyǵyn da tilge tıek etti. Ensıklopedııanyń tusaýkeser rásimi jáne ensıklopedııaǵa engen úzdik mýzeı qyzmetkerlerin arnaıy saltanatty túrde marapattaý rásimi Ulttyq mýzeıde ótedi. Joba avtory – Ulttyq mýzeıdiń ǵylymı-ádistemelik qyzmet basshysy, fılosofııa doktory (PhD) Saıa Alıpova.
Baǵashar TURSYNBAIULY,
«Egemen Qazaqstan»
