Aıtysqa belgili satırık jazýshy, Qazaqstan jazýshylar odaǵy Qostanaı fılıalynyń tóraǵasy, kóp jyldan beri Qostanaı-Torǵaı óńirinde aıtystyń damýyna atsalysyp júrgen Ǵumar Ahmetchın jáne aıtys aqyny, QR Mádenıet qaıratkeri, jas aqyndar ustazy Álfııa Ormanshına jáne taǵy basqalar qazylyq etti. Aıtpaqshy, aıtys jergilikti ónerpaz jas Marǵulan Ospanovtyń aıtys aqyny Qudaıberli Myrzabekovtyń sózine jazylǵan «Aıtys áni» ánimen ashyldy.
Aıtysta 8 aqyn, ıaǵnı Astanadan Azamat Máljanbaı, Qaraǵandydan Botagóz Muhıtdenqyzy, Almatydan Aıbek Bestenqulov, Petropavldan Maqsat Serik, Qostanaı oblysynan Saltanat О́telbaeva, Batyrlan Saǵyntaev, Mamaı Iztileý, Toba О́tepbaevtar tórt jup bolyp óner kórsetti.
«Aqyndardyń daıyndyǵy jaqsy boldy. Kórermenniń jyrǵa degen sýsynyn qandyrdy. Astana, elimizdiń jetistikteri týraly jyr kórigin qyzdyrdy, kemshilikter de olardyń óleńinen tys qalǵan joq, ázil-qaljyńdy da óleńge ornymen óre bildi. Osy aqyn balalardyń basym kópshiligi ózimizdiń qolymyzdan shyqqan balapandar edi. Olardyń barlyǵy derlik alaman aıtystarda júlde alyp júrgender. Aqyndyq degen týma, daryn bolsa da eńbek ǵoı. Olardyń óskenine qýanamyn» dedi 25 jyldan beri oblysta balalar aıtysyn uıymdastyryp, ózi qazylyq etip kele jatqan Ǵumar Ǵarıfuly.
Aıtysta qazaqtyń qara óleńi jeńdi desek te, saıystyń aty – saıys, jeńimpazdar bolýy tıis. Birinshi oryndy arqalyqtyq Batyrjan Saǵyntaev, ekinshi oryndy astanalyq Azamat Máljanbaev, úshinshi oryndy qostanaılyq Saltanat О́telbaeva jeńip aldy. Aıtystan keıin Lısakov qalasynyń ákimi atynan aıtys óneriniń Qostanaı óńirinde órken jaıýyna úlken eńbek sińirip júrgen Ǵumar Ahmetchınge shapan jaýyp, qurmet kórsetildi.
Názıra Járimbet,
«Egemen Qazaqstan»
Qostanaı
