Atyraýda qurylys salasynyń úzdikteri anyqtaldy 

Qurylysshylar kúni merekesine oraı Samal yqsham aýdanynda salynyp jatqan órt sóndirý deposynyń qurylysynda qurylys mamandary arasynda baıqaý ótti. Baıqaýdyń basty maqsaty – óńirimizdegi qurylys mamandarynyń kásibı deńgeıin joǵarylatý men jastardy qurylysshy mamandyǵyna tartý bolyp tabylady. Oblystyq qurylys basqarmasynyń uıymdastyrýymen ótken saıysta Temirlan Sapar «Úzdik sylaqshy», Bolatbaı Esqaıyrov «Úzdik qalaýshy» jáne Baqytjan Sabyrov «Úzdik dánekerleýshi» atandy. 

- Mamyr aıynda Qyzylorda qalasynda qurylysshylar arasynda ótken jarysta, Atyraý oblysynyń tas qalaýshylary birinshi oryndy ıelengen bolatynbyz. Sol bastamanyń jalǵasy retinde búginde óńirimizde ótkizip jatyrmyz. Baıqaýdan jeńimpaz bolǵan qatysýshylarymyzǵa júldeli oryndarymyz bar. Sonymen qatar, aldaǵy kúnderi qurylys mamandary arasynda sporttyq saıystar ótkiziletin bolady, - deıdi Atyraý oblystyq qurylys basqarmasynyń qurylys bóliminiń basshysy Saqparov Nurlybek.

Aıta keteıik, bizdiń elimizde qurylysshylar kúni jyl saıyn tamyz aıynyń ekinshi jeksenbisinde atalyp ótedi.