Sondaı-aq taraptar eki eldiń kásipkerleri úshin kirý vızasyn rásimdeýge ózara járdemdesýge kelisti, dep habarlady elimizdiń Syrtqy saýda palatasynyń ókilderi. Qazaqstandyq kompanııalar Túrikmenstan naryǵyna ónimderin ótkizýge kópten beri qyzyǵýshylyq tanytyp keledi. Atalǵan saýda-ekonomıkalyq mıssııa osy eldegi Qazaqstan elshiliginiń qoldaýymen ótti. Oǵan mashına jasaý, qurylys, farmasevtıka jáne tamaq ónerkásibi salalaryndaǵy 16 kompanııa qatysty. Olardyń qatarynda «IT&M», «Qazfosfat», «QazAzot», «Kentaý transformator zaýyty», «Rahat», «Tıkkýrıla», «Qazaqstan Ǵarysh Sapary», «Azııa avto», «Baıan Sulý», «Port Quryk» jáne basqa da kásiporyndar bar.
Elder arasynda týyndaıtyn negizgi problemalardyń qataryna túrikmenstandyq áriptester qazaqstandyq kásipkerlerge tólem jasaý kezinde qıyndyqtarǵa dýshar bolyp jatatynyn jatqyzýǵa bolady. Bul mandatty erkin aıyrbastaý múmkindiginiń bolmaýymen baılanysty. Sondyqtan birlesken jumystyń belsendiligin arttyryp, yntymaqtastyq ornatý maqsatynda «KazakhExport» AQ top-menedjerleri «Túrikmenstan» jáne «Halqbank» memlekettik bankteriniń ókilderimen, sondaı-aq «Ryzgal» kommersııalyq bankimen kelissóz júrgizdi.
Saýda-ekonomıkalyq mıssııanyń nátıjeleri boıynsha, «Dolce» farmasevtıkalyq kompanııasy yntymaqtastyq jónindegi eki memorandýmǵa qol qoıdy. Al «Beles-agro» JShS «Beles-Market» saýda belgisimen Túrikmenstanǵa bıyl ár aı saıyn 3-4 myń tonna kóleminde un men ósimdik maıyn jetkizip turý týraly kelisimshartqa qol qoıdy.
«Egemen-aqparat»
